Iu kapën 180 kg kokainë në dy vite, arrestohet Eduart Dauti, pronari i “Alba Exotic Fruit”

Teksa mendohej se fshihej prej vitit të kaluar në Francë, policia e kryeqytetit zbuloi në Kombinat biznesmenin e shumëkërkuar, qëndronte në shtëpinë e tij. Kompanisë së tij dhe ortakëve, iu kapën në periudhën 2019-2021, ngarkesa në 6 raste me drogë, që vinin me anije nga Ekuadori. Sekuestrimet në Portin e Durrësit, Dauti asnjëherë s’i pranoi akuzat. Vetëm vitin e kaluar u bënë 5 ngarkesa në tre muaj, me sasi të vogla. Historiku i operacioneve dhe të ndaluarit

Arrestohet pas dy vitesh kërkimi biznesmeni Eduart Dauti, i akuzuar për 6 rastet e trafikut të kokainës nga Ekuadori në mes të kontenierëve me banane, në portin e Durrësit, gjatë viteve 2019-2021. Shërbimet e Komisariatit të Policisë Nr. 6 Tiranë, njoftuan se fal operacionit të koduar “Rada”, lokalizuan dhe prangosën biznesmenin 51-vjeçar, banues në kryeqytet, në zonën edhe ku fshihej prej kohësh, pas kthimit nga Franca.

“Ky shtetas është shpallur në kërkim, pasi Gjykata e Posaçme e Shkallës së Parë për Korrupsionin dhe Krimin e Organizuar i ka caktuar masën e sigurisë “arrest në burg”, për veprat penale “prodhimi dhe shitja e narkotikëve”, e kryer në bashkëpunim, “grupi i strukturuar kriminal” dhe “kryerja e veprave penale nga organizata kriminale dhe grup i strukturuar kriminal”, thuhet në njoftimin zyrtar. Kujtojmë se Dauti, pronar i kompanisë “Alba Exotic Fruit”, nuk e ka pranuar asnjëherë akuzën nga arratia, duke thënë se ka porositur vetëm banane dhe se kontenierët s’janë në pronësi të tij, por vetëm malli. Policia kishte ndaluar në operacione të ndryshme ortakët e tij, që janë gjithashtu nën proces. Operacioni për kapjen e Dautit kishte nisur prej 13 korrikut 2021, ku në Portin e Durrësit, nga Task Forca permanente e përbërë nga Policia Kufitare, strukturat hetimore të Drejtorisë Vendore të Policisë Durrës dhe autoritetet doganore të Portit, gjatë kontrolleve në konteinerët e firmës “Alba Exotic Fruit”, në disa raste, janë gjetur dhe sekuestruar në cilësinë e provës materiale, sasi lënde të dyshuara narkotike të llojit kokainë. Kujtojmë se në burg është edhe menaxheri i kompanisë Barjon Gumeni.

Rastet kur “Alba Exotic Fuit” i janë gjetur drogë në banane

Kompanisë “Alba Exotic Fruit” i është gjetur kokainë në kontenierët me banane për herë të fundit më 12 tetor 2021, ku u kapën sasi kokaine. Në dy nga konteinerët e ngarkuar me banane, që kishin ardhur nga Ekuadori, për llogari të kësaj firme, u gjetën 10 kilogramë e 185 gramë kokainë, e cila ishte fshehur në pjesën fundore, te kapakët e motorëve frigoriferikë, një skemë e përdorur edhe më herët nga “Alba Exotic Fruit”. Për këtë sasi droge të kapur është vënë në pranga administratori i ri i kësaj firme, Ermal Arapi. Më 7 shtator, ku iu kapën 7,7 kg kokainë. Ndërkohë më herët, në 13 korrik në Portin e Durrësit, kësaj kompanie dhe u sekuestruan 11 kg e 675 gramë kokainë, ndërsa 10 ditë më vonë, më 23 korrik, u gjetën 6,5 kilogramë të tjera, të cilat ishin fshehur në kontejnerët e po të njëjtës kompani. Më 29 korrik 2021, kompanisë iu gjetën dhe u sekuestruan 7,25 kilogramë kokainë, po në vijim të operacionit “Rada”. Kompania ‘Alba Exotic Fruit’ rezulton e përmendur edhe më parë në ‘historinë’ me trafik droge ku në vitin 2019, në kontejnerët e kësaj kompanie, në Pire të Greqisë, u gjetën 137 kg kokainë, që u zëvendësua me oriz me GPS nga autoritetet e DEA-s amerikane dhe policisë greke. Për kokainën e ngarkuar në kontejnerët e ‘Alba Exotic Fruit’ në 2019 u arrestuan Altin Myslihaka dhe Ardian Begaj dhe u shpall në kërkim biznesmeni Gentian Malindi. Në total kësaj kompanie i janë kapur 180,5 kg kokainë që vinte nga Ekuadori me anije.