Luks pa kufi, ligj i rreptë, ndeshje 100 minuta dhe off-side me “Syrin e fajkoit”!

Tjetër ide revolucionare e FIFA-s, ndeshjet e Botërorit sipas Infantinos duhet të zgjasin për 100 minuta, për të rritur lojën efektive që vritet nga vonesat dhe për të justifikuar biletën e tifozëve. Gjithashtu teknologji e sofistikuar për pozicionet jashtë loje. Botërori më i shtrenjtë në histori, në shtetin e vogël arab dhe ndër më të pasurit në botë. Çmime të shtrenjta, infrastrukturë moderne, 34 mld dollarë qarkullimi që nga momenti i përzgjedhjes dhe 3,5 mld dollarë që do i shpërndahen skuadrave

Katari pritet të zhvillojë në dimër Botërorin më të shtrenjtë në histori. Më luksozi, ku vetëm për stadiumet janë harxhuar mbi 2 mld dollarë në ndërtim, teksa miliarda të tjera i ka marrë lobimi, infrastruktura urbanistike, ligjore apo logjistike. Specialistët shprehen se që prej momentit kur nisi lobimi për të marrë të drejtën e zhvillimit të Botërorit 2022, kur drejtonte Sep Blater dhe që u bë qendër e polemikave dhe aferave korruptive, e deri në fund kur ky kompeticion të përfundojë, xhiroja totale e parave shkon në mbi 30 miliardë dollarë. Një shifër marramendëse kjo, që shpjegon edhe luksin apo teknologjinë e fjalës së fundit që ka investuar shteti arabik më i pasur në botë për frymë. Edhe pse me një popullsi modeste, që s’i kalon 1,7 mln banorë, Katari bëhet gati të presë mbi 2 milionë vizitorë-tifozë në muajt nëntordhjetor për eventin më popullor në botë. Me kuptimin e plotë të fjalës botërori i luksit, por edhe i ligjit të rreptë. Katari ka paralajmëruar lëvizjet e homoseksuale se nëse do valëvisin flamurin e tyre në stadiume, do përfundojnë në biruca. Shteti fetar mysliman pranoi që kjo kategori të ishte pjesë e Botërorit si një kusht i FIFA, por jo që të shfaqeshin me parulla, tubime, flamuj dhe veshje. Gjithashtu janë paralajmëruar edhe ultrasit e dhunshëm apo dhe ‘pijanecët sherrxhinj’. Një tjetër investim i Katarit për këtë botëror janë stadiumet superluksoze dhe me ajër të kondicionuar, që do zbusin temperaturat, që edhe pse zhvillohet në dimër, pritet të jenë të larta. Çmimet do të jenë çmenduri më vete, me deri në 10 mijë euro nata për hotelet me pesë yje apo dhe 20 euro një shishe birre. Dhe nuk mjaftohet vetëm me këto risi jashtë fushave të blerta, pasi FIFA dje paralajmëroi edhe ndryshime të rregullores aktuale të lojës së topit me këmbë. Gjithashtu të ardhurat që do shpërndahen për skuadrat pjesëmarrëse pritet të jenë rreth 3,5 mld dollarë në total, më e larta ndonjëherë.

Risitë e reja në Botërorin Katar 2022, ndryshime dhe në rregullat e lojës

Pasi dështoi me idenë e zhvillimit të Botërorit çdo dy vite presidenti i FIFA-s Giani Infantino po mendon për diçka tjetër revulocionare. Teksa po afrohet Botërori, ideja e fundit është që ndeshjet e futbollit të zhvillohen për 100 minuta dhe jo 90 siç është aktualisht. Mediat e huaja shkruajnë se arsye është se loja efektive gjatë një ndeshje është e ulët. Përshembull në Champions League loja efektive është 64.7%, ndërsa në Premier League 62%. Mbetet për t’u parë nëse shtimi i minutave mund të rrisë lojën efektive, por që kjo të ndodhi është e vështirë. Megjithatë edhe kjo ide pritet të marrë shumë kritika, ashtu si edhe ajo e organizimit të Botërorit çdo dy vite. Gianni Infantino, gjatë vizitës së tij në Itali për 100-vjetorin e Artemio Franchit, ngriti çështjen që e konsideron themelore: kohën efektive të lojës. Deklaratat e tij bënë bujë në Itali, ku debati për këtë risi në lojën më bukur është gjithmonë aktual dhe u bë sërish lajm pas ndeshjes së fundit Juve-Inter. Sipas “Corriere dello Sport”, Infantino dëshiron që Botërori i ardhshëm të jetë më spektakolari brenda dhe jashtë fushës. Ai dëshiron t’u japë fund pauzave të pavlefshme: spektatorët dhe stacionet televizive “paguajnë për 90 minutat, jo për 50 që luhen realisht”. Futja e kohës efektive do të kërkonte një rregull të ri nga IFAB, por FIFA dëshiron të avancojë duke e zgjatur kohën në fund të 90 minutave. Është diçka që ka ndodhur tashmë nga faza 1/16 e Botërorit “Rusi 2018”: Në 16 ndeshje janë luajtur gjithsej 140 minuta pas kohës së rregullt, më shumë se tetë minuta për ndeshje (përfshirë shtesat). Gazeta italiane shkruan: “duhet të imagjinoni, në Katar ndeshjet që do të kalojnë 100 minutat” edhe për shkak të 10 zëvendësimeve që lejohen tashmë. Një tjetër risi që është planifikuar për muajt në vijim është “offside automatik”. Duke përdorur të njëjtin parim “Haëkeye” (Syri i Fajkoit), pozicionet jashtë loje do t’u sinjalizoheshin menjëherë në orët e gjyqtarëve anësorëve, duke eliminuar pritjen e gjatë.