Antimafia shpërbën kartelin shqipfolës të Ergys Dashit, tre muaj pas ekzekutimit në Ekuador

Goditet grupi i narkotrafikut në Torino, 11 të arrestuar, mes tyre shumë shqiptarë, polakë dhe vendas. Sekuestrohen 80 kg drogë, me vlerë 4,5 mln euro. Hetimet prej vitit 2017 me përgjime. Droga vinte nga Amerika e Jugut dhe shpërndahej në Italinë e veriut, Holandë, Zvicër, Gjermani dhe deri në Shqipëri. Si u vra në atentat durrsaku Dashi më 22 janar në Guayaquil, lidhjet dhe akuzat e mëparshme

Ekzekutimi në një atentat mafioz rreth tre muaj më parë në Ekuador të ‘bosit’ të kartelit shqipfolës Ergys Dashi, ka shthurur prej javësh edhe organizatën kriminale italo-shqiptare, e cila mori ditën e djeshme një goditje fatale nga Antimafia e Italisë. Policia e vendit fqinj bëri me dije se shkatërroi celulën e narkotrafikut, që merrej me trafik kokaine dhe kanabisi, teksa në përbërje kishte shumë ekstrakomunitarë dhe vendas. Gjatë operacionit të zhvilluar orët e fundit, bëhet me dije se 11 persona janë arrestuar në Torino. Mes të arrestuarve ka edhe shqiptarë. Mediat italiane thonë se kanë sekuestruar mbi 80 kg drogë, me vlerë rreth 4,5 milionë euro nëse shitej me pakicë.

Pas hetimeve të kryera në territorin italian dhe jashtë vendit (Ekuador, Slloveni, Shqipëri, Poloni, Gjermani, Zvicër), janë kryer edhe 30 kontrolle. Policia italiane në Torino sekuestroi në territorin italian gjithsej 80 kg kokainë dhe më shumë se 7 kg marihuanë, teksa arrestoi 8 persona në flagrancë, që dyshohet se kishin rolin e korrierëve. Ata udhëtonin me makina të modifikuara posaçërisht në Slloveni, për trafikun e drogës, shkruajnë mediat italiane. Rrugët e trafikut ishin të përcaktuara, kokaina sigurohej nga vendet e Atlantikut, ndërsa marihuana nga vendet e Ballkanit dhe kishte si destinacion Italinë Veriore, Slloveninë, Holandën, Zvicrën dhe Gjermaninë.

Grupi i trafikut të drogës i goditur ditën e sotme, duket se ka lidhje shqiptarin Ergys Dashi i ekzekutuar më 22 janar të këtij viti në kryeqytetit e Ekuadorit, në Guayaquil. Dashi edhe më herët ishte proceduar dhe dënuar nga drejtësia e vendit fqinj për trafik heroine, në vitin 2004 dhe ishte person i skeduar për këtë aktivitet. Vitet e fundit ishte vendosur në Ekuador, një depozitë e madhe e kokainës që eksportohet drejt Europës me anije dhe nga drejonte punët e kartelit të tij. Hetimet kanë nisur në vitin 2017, kur ka pasur disa arrestime në Torino, (qarqet San Salvario dhe San Paolo), pas së cilës karabinierët mblodhën prova që i shërbyen për të rindërtuar zinxhirin e drejtimit të rrjetit. Tashmë gjykata italiane ka caktuar masën e sigurisë ‘arrest me burg’ 6 persona, 3 të tjerë në arrest shtëpie dhe 2 detyrim paraqitje. Droga kishte si destinacion për shitje veriun italian, Slloveninë, Holandën, Zvicrën dhe Gjermaninë, me makina që i modifikonin për fshehjen e drogës.

Kush ishte Ergys Dashi, nga Durrësi te dënimi në Itali dhe vendosja në Ekuador Ergys Dashi, nga Durrësi, dyshohej se kishte lidhje me njerëz të botës së krimit nga qyteti bregdetar dhe me Eldi Dizdarin, të shpallur në kërkim ndërkombëtar dhe të strehuar në Dubai, si vendi ku strehohen kriminelët shqiptarë për shkak se qeveria shqiptare nuk ka marrëveshje ekstradimi me autoritete arabe. Eldi Dizdari njihet për lidhjet mes bosëve të drogës në Amerikën Latine dhe dyshohet se kishte lidhje shumë të forta me “Ndragheta”. Dashi në vitin 2004 është arrestuar nga policia italiane po për kultivim droge, si pjesë e një operacioni që çoi prapa hekurave 32 persona. Trafiku i heroinës drejtohej nga shqiptari Ergys Dashi, në atë kohë vetëm 25 vjeç, i cili përfundoi pas hekurave pas një hetimi 3-vjeçar nga autoritete italiane në Pulia. Transporti i drogës, heroinë e cilësisë së shkëlqyer, bëhej përmes makinave të modifikuara. Droga shitej me një çmim konkurrues, si për të lejuar fitime të mëdha për ata që e blenë. Dashi u ekzekutua mbrëmjen e 22 janarit, në orën 19:00, kur një nga autorët, i kamufluar me një tufë lulesh si ‘i dashuruar”, hyri brenda lokalit-restorant ku darkonte viktima, teksa jashtë e priste bashkëpunëtori me motor. Në momentin e ekzekutimit, ka pasur edhe klientë të tjerë në lokal, të cilët kanë mbetur të tmerruar nga breshëria e armës. Në vendngjarje, ekspertët e kriminalistikës kanë grumbulluar mbi 20 gëzhoja. Sipas mediave në Ekuador, dyshohet se Dashi është i përfshirë në trafikun e kokainës dhe se prishja e pazareve të drogës të jetë shkak i ekzekutimit të tij nga bandat rivale.