Arrestimi i dy shqiptarëve për kokainë nga Amerika Latine, mediat belge zbulojnë të shkuarën kriminale

Mediat belge i kanë bërë jehonë arrestimit të dy shqiptarëve, që cilësohen si bosët e kokainës.

Sipas mediave, dy shqiptarë kanë qenë të dënuar më parë në Antuerp, për kontrabandë kokaine dhe janë arrestuar në Shqipëri dhe Ekuador. Ata janë Mirlind Balla, që u dënua me 5 vjet burg, ndërsa tregtari i frutave Nezdet Vokshi, 55 vjeç, u dënua me shtatë vjet burg në dosjen ku u dënua edhe prezantuesi holandez i televizionit, Frank Masmeijer. Sipas “Het Nieuwsblad”, ai u arrestua me kërkesë të Holandës. Nezdet Vokshi u arrestua në Peru në vitin 2012, me kërkesë të autoriteteve të Antuerpen. Në pritje të procedurës së ekstradimit, bosi i drogës u vendos në arrest shtëpie në Peru. Pasi gjyqtari kishte vendosur që mund të ekstradohej në Belgjikë, Vokshi u konstatua se ishte arratisur.

Peruja nisi një hetim korrupsioni ndaj disa oficerëve të policisë, që mund të kenë luajtur një rol të dyshimtë në mbikëqyrjen e arrestit shtëpiak. Rezultati i atij hetimi është i panjohur. Vokshi ishte në Listën e Kuqe të Interpolit që nga 15 marsi, pasi shërbimet hetimore gjetën vendndodhjen e tij. Sipas hetimeve ai ishte i arratisur që nga viti 2010 dhe fillimisht iku në Peru. 52-vjeçari u kap teksa drejtonte një kamion “Ford”, në rrugën që të çon në urbanizimin e Ciudad Celeste, një zonë pranë rezidencës së tij në Villa Club. Ai ndodhej në Ekuador me gruan dhe vajzën e tij që nga viti 2018, vit në të cilin ai kaloi nga Peruja në Ekuador, përmes kufirit tokësor. Policia pas arrestimit sekuestroi edhe 6 celularë. Nga kërkimet e bëra Vokshi ishte regjistruar si tregtar frutash në Ekuador. Prej kohësh mundi t’i shpëtojë autoriteteve, ndërsa rezulton se ishte regjistruar po ashtu si tregtar edhe në Barcelonë, Spanjë.