Këshillimi, praktikë e dyshimtë dhe manipuluese

Po të analizoje pyetjet e të famshmit, “Këshillimi Kombëtar”, vë re se janë të gjitha çështje dhe pika që kryeministri Rama i ka për zemër. Unë mendoj që ai thjesht kërkoi një mënyrë që të ligjërojë veprimet e veta. Maskon dëshirat e veta, me “zërin e popullit”. Sipas tij, “sovrani foli”. Dhe ai do legalizojë kanabisin, do bëjë amnisti fiskale, do legalizojë pastrimin e parave, do pezullojë prokurorë e gjyqtarë që marrin vendime që atij nuk i pëlqejnë, do vazhdojë Ballkanin e Hapur e gjithçka tjetër për të cilën ai ka vite që kritikohet nga qytetarët e vet dhe sidomos nga ndërkombëtarët. Po të analizoje pyetjet e “Këshillimit Kombëtar”, të gjitha fillonin me “ka njerëz që thonë…” Bëhet shteti me “me the- të thashë”?!! 500 mijë qytetarë janë përgjigjur tha, vajza e ulur përkrah Ramës. Ama askush nga ata, as vetë Kryeministri, nuk është i zoti të vërtetojë që ky është një proces i drejtë, i pamanipuluar. Disa pyetësorë të trajtuar si korrespondencë personale e “të madhit” me popullin, të bërë me paratë dhe instrumentet shtetërorë, nuk mund të kthehen në “detyra qeverie” sepse për këtë ka votime dhe program. Zoti Rama paralajmëroi se Këshillimi do të bëhet çdo vit. Sa herë të dojë diçka që kërcet dhe shkakton kundërshti, Kryeministri do dalë “të pyesë popullin”. Nuk do jetë çudi që në Këshillimin e radhës, të hartohet pyetjen: Ka njerëz që thonë që zgjedhjet e përgjithshme parlamentare nuk janë më të nevojshme. Si mendoni ju? Pastaj do dalin të na thonë që 70% e përgjigjeve nga vetë ne “populli” ishte, Po! Letër e nënshkruar, Naim Sulollari