Arrestohet një tjetër anëtar i “Big Five” të kokainës Itali-Shqipëri, kapet në Vlorë 35-vjeçari
Kapet i kërkuari Aldo Tushaj, që i shpëtoi operacionit të parë që u zhvillua bashkë me italianët. Pjesë e 35 urdhër-arresteve të lëshuara nga SPAK. Dyshimet edhe për lidhjet me organizatën e të ekzekutuarit Ergys Dashi në Ekuador. Kodet sekrete që përdorte organizata për trafikun, zbardhen disa nga përgjimet
Një tjetër anëtar i kartelit shqipfolës të të ekzekutuarit në Ekuador, Ergys Dashit, është kapur dje në vijim të operacionit që nisi fundjavën e kaluar në Itali dhe çoi në pranga 13 persona, shqiptarë, italianë dhe polakë. Policia e Vlorës bëri me dije se nën drejtimin e Prokurorisë së Posaçme SPAK, arrestoi një 35-vjeçar, që kërkohej për grup të strukturuar kriminal dhe kryerje të veprave penale nga organizata kriminale në kuadër të operacionit “Five”. Në pranga përfundoi Aldo Tushaj, i cili ishte nën masën e sigurisë “arrest në burg” në mungesë. Një muaj më parë, 35 urdhër-arresti u prenë nga SPAK për shkatërrimin e një grupi kriminal me qendër në Vlorë. Operacioni u zhvillua edhe në Durrës, Tepelenë, Gjirokastër, Tiranë dhe Lezhë. Në operacion u arrestuan edhe punonjës policie. Ka dyshime të forta se bëhet fjalë për një nga celulat e organizatës shqiptare me bazë narkotrafiku të kokainës në Ekuador. Sipas të dhënave hetimore, bëhet fjalë për grupin e të ndjerit Ergys Dashi, që u vra në një atentat më 22 janar në Guayaquil.
Përgjimet e organizatës dhe kodet mes tyre: Më sill “5 birra dhe 100 euro”! Policia italiane ka zbërthyer mënyrën se si funksiononte grupi i Ergys Dashit, i cili u vra pak muaj më parë në Ekuador duke faktuar transportin e kokainës nga Amerika Latine në
Europë dhe më pas shpërndarjen në doza më të vogla. Sipas dosjes hetimore të siguruar nga ABC, grupi përdorte portet e Holandës për të sjellë kokainën nga Amerika Latine dhe më pas e shpërndante nëpër Europë. Prokuroria italiane thekson se organizatorët e grupit ishin Ergys dhe Edmond Dashi. Këta të fundit e kishin organizuar grupin në mënyrë kapilare duke lënë nga një përgjegjës për rajonet e Italisë si edhe në shtetet përreth. Kështu për shembull, sipas prokurorisë italiane, Ergysi dhe Edmondi kishin lënë Rigels Yzeirajn si përgjegjës për rajonet qendrore të Italisë, ndërsa Bedrana Ahmiç ishte përgjegjëse për Slloveninë. Këta të fun
dit bënin më pas organizimin kapilar të grupit më poshtë. Përgjimet Prokuroria italiane e ka ndjekur fizikisht dhe përmes përgjimeve grupin në fjalë duke zbuluar edhe kodet e tyre. Kështu për shembull, kur pjestarët në nivelet e poshtme të grupit donin të porosisnin kokainë, nuk përdornin fjalën “doza” por “birra”. Kur donin 5 doza për shembull, sipas prokurorisë italiane, ata thonin “më sill 5 birra”. E njëjta formë kodifikimi ishte përdorur edhe sa i poërket sasisë. Kur flisnin për sasinë, ata nuk thonin “gramë”, por “euro”. Për shembull, nëse kërkonin për të shpërndarë 100 gramë kokainë thoshin “më duhen 100 euro”.