Trafikantët me strategji të re, rrethojnë parcelat e hashashit me kamera dhe granata!
Rast i paprecedentë u zbulua nga Policia e Kukësit vitin e kaluar. U gjetën fije të lidhura me granata ofensive, përreth tokës në pyllin e Kovaçit, e mbjellë me kanabis sativa, si dhe disa kamera që ruanin zonën. Dy persona janë nën akuzë, dje u kap një prej tyre. Në Vlorë, operacioni “Çairet” çon në pranga një prej të dyshuarve që mbolli serat me 262 kg drogë vitin e kaluar. Më herët ishin kapur kryeplaku dhe një punonjës i OSHEE-së
Sa herë organet ligjzbatuese forcojnë masat e kontrollit dhe goditjes ndaj dukurive kriminale, grupet bëjnë hapa të tjerë strategjikë për të kamufluar aktivitetet e paligjshme. Trafikantët e drogës janë gjithmonë në kërkim të mënyrave të reja për të ruajtur parcelat e tyre të kultivuara me kanabis, që të mos kapen nga policia. Një rast mjaft i sofistikuar është zbuluar në Tropojë, ku dy trafikantë kishin mbjellë me kanabis një parcelë në pyllin e fshatit Kovaç. Mënyra se si kishin zgjedhur ta ruanin parcelën nga zbulimi i policisë ishte sa origjinale, aq edhe e rrezikshme. Parcela monitorohej nga kamerat e sigurisë, që ishin vënë në degët e pemëve përreth, ndërsa zona e mbjellë me kanabis ishte e rrethuar me një fill sintetik, i lidhur me dy granata, që të shpërthenin sapo një person të prekte fillin. Kjo parcelë u zbulua nga policia në 28 shtator 2021, në pyllin e fshatit Kovaç, ndërsa dje ra në pranga i dyshuari Agron Hoxhaj, 51 vjeç, ndërsa është ende në kërkim Bekim Çelaj, 22 vjeç, si bashkëpunëtor. Dy të akuzuarit mësohet se janë edhe autorë të një rasti tjetër të kultivimit të bimëve narkotike, në vitin 2020, në fshatin Hoxhaj.
Vlorë/ Pas kryeplakut dhe punonjësit të OSHEE, kapet pas një viti i kërkuari i “Çaireve”
Mbollën 262 kg kanabis në një serë në Vlorë, arrestohet një trafikantët, në kërkim dy të tjerët. Më herët u arrestuan kryeplaku i fshatit dhe elektricisti i OSHEE-së. Një vit pasi ishte shpallur në kërkim dhe iu shkatërruar sera më kanabis që kishte mbjellë, është arrestuar një nga të dyshuarit, ndërsa po vijojnë të jenë ende në kërkim dy të tjerë. Gjatë operacionit të koduar “Çairet”, në pranga ra Klajdi Kapllanaj, 21 vjeç, ndërsa janë në kërkim Fatbardh e Engjëllush Kapllanaj, të afërm të Klajdi Kapllanajt, përkatësisht 45 dhe 22 vjeç. Operacioni “Çairet” u zhvillua në gusht 2021, ku u sekuestruan 262 kg lëndë narkotike kanabis, teksa 210 kg kanabis u gjetën në banesën e Fatbardh Kapllanaj, ndërsa në një ambient pranë banesës së tij e përshtatur si serë, me lidhje të jashtëligjshme të energjisë elektrike, u kapën 52 kg lëndë kanabis, në proces tharjeje. Gjatë aksionit u arrestua kryeplaku i fshatit Kaninë, Andon Todi, për veprën penale “moskallëzimi i krimit” dhe Gramos Islamaj, punonjës i OSHEE-së, për “shpërdorim i detyrës”.