“Dy shkallët e GJKKO morën vendim të drejtë për ish-ministrin Lefter Koka”
Zbardhet i arsyetuar juridikisht dhe ligjërisht vendimi i plotë i GJL, për shkaqet përse u refuzua rekursi i biznesmenit ish-deputet. Ish-ministri do mbetet në qeli, akuzohet nga SPAK-u për korrupsion e shpërdorim detyre, me vlerë rreth 3,7 mln euro
Gjykata e Lartë zbardhi të argumentuar juridikisht, ligjërisht dhe logjikisht vendimin që mori Kolegjit Penal ditë më parë, për të mos pranuar rekursin e ish-ministrit të Mjedisit, Lefter Koka, që kërkonte lirimin nga paraburgimi me masë të butë sigurie, që ia kanë dhënë dy shkallët e para të GJKKOsë prej muajit dhjetor të vitit të kaluar. Në arsyetim, institucioni i shkallës së tretë shprehet se biznesmeni ish-deputet ka marrë njëherë përgjigje nga Gjykata e Apelit, e cila e la në burg, dhe rrjedhimisht sipas tyre, ajo “nuk mund të rishikojë një kërkesë për të cilën i akuzuari ka marrë njëherë përgjigje nga një Gjykatë Apeli”.
“Kolegji vlerëson se kërkuesi ka paraqitur si shkaqe rekursi të njëjtat pretendime si në ankimin e paraqitur përpara Gjykatës së Posaçme të Apelit, pretendime për të cilat ai ka marrë përgjigje të arsyetuar nga gjykata. Është momenti për tu vënë në pah se, Gjykata e Lartë është vetëm një gjykatë ligji, e cila shqyrton pretendimet e palëve për zbatim të gabuar të ligjit material apo procedurial, ose kur vendimi i ankimuar vjen në kundërshtim me praktikën e Kolegjit Penal ose të Kolegjeve të Bashkuara të Gjykatës së Lartë. Pra, kjo gjykatë nuk është një gjykatë fakti dhe pretendimet për vlerësim të gabuar të provave janë një çështje që del jashtë juridiksionit ekskluzivisht ligjor të Gjykatës së Lartë”,
VENDIMI I KOLEGJIT PËR KOKËN:
1- Në lidhje me pretendimet për provueshmërinë e akuzës ndaj kërkuesit, Kolegji vlerëson se këto çështje nuk i përkasin kësaj faze procedurale. Në fazën e hetimeve paraprake në të cilën ndodhet çështja, gjykata e hetimeve paraprake ka arsyetuar në lidhje me masën e sigurimit të caktuar ndaj personit nën hetim. Pretendimet e tjera që i përkasin themelit të çështjes do të gjykohen në një fazë të mëvonshme, gjatë shqyrtimit të çështjes në themel (nëse çështja penale do të avancojë deri në atë fazë).
2- Në lidhje me pretendimet për kushtet shëndetësore të rënduara të kërkuesit, që nuk përligjin vijueshmërinë e masës së sigurimit personal “arrest në burg”, Kolegji
3vlerëson se këto pretendime janë shqyrtuar një herë dhe kanë marrë përgjigje të arsyetuar nga gjykata e apelit. Gjatë shqyrtimit të rekursit në dhomën e këshillimit nuk konstatohet se ka zbatim të gabuar të ligjit material apo procedural në vendimmarrjen e kësaj gjykate, vendimi i së cilës është rekursuar në Gjykatën e Lartë.
Sa më sipër, Kolegji arrin në përfundimin se, rekursi i paraqitur nga kërkuesi Lefter Koka kundër vendimit nr. 01, datë 02.01.2022 të Gjykatës së Apelit për Korrupsionin dhe Krimin e Organizuar nuk përmban asnjërin prej shkaqeve të parashikuara në nenin 433 të Kodit të Procedurës Penale, prandaj si i tillë ai nuk duhet të pranohet.