Pretendimet e Dick Marty për vrasje, Kurti: Do të bashkëpunojmë me Zvicrën

Kosova do të bashkëpunojë me shtetin zviceran për të kuptuar më shumë mbi pretendimet e ishraportuesit të Këshillit të Europës, Dick Marty, se struktura serbe kishin planifikuar vrasjen e tij.

Marty, ish-senator zviceran, ka hetuar krimet e supozuara të Ushtrisë Çlirimtare të Kosovës kundër pakicave etnike dhe rivalëve politikë, në periudhën janar 1998-dhjetor 2000.

Kryeministri Albin Kurti tha se duhen mësuar shkaqet, rrethanat dhe informacione të tjera mbi rastin që, sipas tij, nuk ka të bëjë vetëm me “Dick Martyn, por edhe me Kosovën dhe shqiptarët”.

“Shteti dhe populli i Kosovës e kanë ditur gjithmonë se kush është

Serbia, mirëpo unë shpresoj që Quinti (Shtetet e Bashkuara, Franca, Gjermania, Italia dhe Britania) në Beograd, Bashkimi Evropian në përgjithësi, ta ngrenë këtë çështje me presidentin atje dhe të gjitha organet shtetërore, sepse kjo është një akuzë e jashtëzakonshme, e cila i tejkalon përmasat individuale, e përfshin një shtet të tërë”, tha kryeministri i Kosovës.

Kurti ka thënë se “mënyra se si ka operuar Shërbimi Sekret serb në Evropën Perëndimore, edhe ndaj shqiptarëve, edhe ndaj kroatëve, është e njohur botërisht”.

Në një deklaratë për Shërbimin e Ballkanit të Radios Evropa e Lirë, Agjencia serbe e Zbulimit -BIA tha se i ka dërguar letër Shërbimit Federal të Inteligjencës Zvicerane, përmes së cilës ka mohuar pretendimet për përfshirjen e shërbimeve serbe të sigurisë në “planifikimin e vrasjes së dikujt”.

Në një intervistë për median zvicerane “RTS”, më 10 prill, Marty ka thënë se ka 16 muaj që është nën mbrojtje.