KPA rikthen në detyrë një tjetër magjistrat dhe prish shkarkimin e KPK-së. Gjyqtari Fatri Islamaj tha se u shkarkua padrejtësisht

Kolegji i Posaçëm i Apelimit prishi vendimin e shkallës së parë të KPK dhe riktheu në detyrën e magjistratit, të gjyqtarit të Apelit të Tiranës, Fatri Islamaj. Ish-kreu i Gjykatës së Tiranës dhe ish-kreu i KED-it, u shkarkua më herët pas kalimit në Vetting. Sipas KPA-së, magjistrati është shkarkuar padrejtësisht dhe se në të treja kriteret; pasuri, integritet dhe profesionalitet, ka rezultuar se është i pastër. Për rikthimin e Islamajt në detyrë, u votua nga 5 anëtarët e KPA-së.

Islamaj u shkarkua me shumicë votash nga KPK, pasi dy komisioneret Valbona Sanxhaktari dhe Pamela Qirko arritën në përfundimin se subjekti kishte kryer deklarim të pamjaftueshëm për apartamentin e blerë nga i ati, në vitin 2010, në çmimin 65 mijë euro. Sipas shumicës, babai i subjektit nuk kishte pasur burime të ligjshme për blerjen e kësaj pasurie të përdorur nga Islamaj.

Seancën e të martës, në Kolegjin e Apelimit, duke iu referuar opinionit të vëzhguesit ndërkombëtar, Islamaj kërkoi që të vlerësohen drejt marrëdhëniet familjare në raport me qiramarrjen e apartamentit të të atit. Ai e cilësoi të pabazuar konkluzionin e shumicës së trupës KPK-së për moskonsiderimin e marrëdhënies së qirasë, ndërkohë që theksoi se kishte provuar burimet e familjes së prindërve për krijimin e pasurisë në fjalë. Po ashtu, Islamaj këmbënguli se me provat dhe shpjegimet e dorëzuara nuk mbetej asnjë dyshim se e kishte paguar rregullisht qiranë në favor të të atit. Islamaj vërejti se edhe Komisioni nuk kishte ngritur ndonjëherë dyshime se apartamenti i prindërve ku kishte qëndruar me qira, mund të ishte pasuri e tij e fshehur. Ai vërejti se provohej gjithashtu me dokumentacion marrëdhënia e qiradhënies nga babai për subjekte të tjerë gjatë kohës që ai nuk kishte jetuar në atë banesë. “Komisioni i Pavarur i Kualifikimit, në mënyrë të pabazuar, më ka kaluar barrën e provës për të vërtetuar burimet e ligjshme që kanë shërbyer për krijimin e apartamentit ku kam qëndruar me qira. Edhe sikur subjekti të ndodhej në marrëdhënie huapërdorjeje, nuk duhej ngarkuar me barrë prove, pasi nuk kishte të bënte me huamarrje apo dhurim”, pohoi Islamaj dhe këmbënguli se kishte kryer deklarim të saktë në kriterin e pasurisë.

Rastet kur KPA ka rrezuar KPK-në janë të rralla, ndërsa Fuat Vjerdha ishte i pari zyrtar në sistemin e drejtësisë që është kthyer në detyrë në krye të Gjykatës së Apelit të Shkodrës.