Adriatik Lllalla kërkon t’i shpëtojë burgimit: Jam i sëmurë, më rrezikohet jeta!
Me gjendje arresti prej disa muajsh në Romë, ku ka aplikuar për azil politik, pasi kërkon të shmangë ekstradimin për të vuajtur dënimin me 2 vite burgim që ka dhënë Gjykata e Posaçme, ish-kreu i akuzës bën tjetër padi në Gjykatën e Lartë, për pezullimin e dënimit. Shqyrtohet më 22 prill. I janë sekuestruar edhe 5 pasuri të patundshme, 5 vite përjashtim nga administrata. Shkak, mosdeklarimi i pasurisë
Ish-kryeprokurori Adriatik Llalla po bën të pamundurën për të shmangur ekstradimin nga Italia për në Shqipëri dhe për t’i shpëtuar vuajtjes së dënimit me 2 vite burgim, që ka dhënë Gjykata e Posaçme Antikorrupsion, me formë të prerë, për akuzën e mosdeklarimit të të ardhurave dhe fshehjes së tyre. Në gjendje arresti të zbutur prej disa muajsh në Romë për llogari të autoriteteve shqiptare, ishkryeprokurori Adriatik Llalla, i është drejtuar me një kërkesë të re Gjykatës së Lartë. Ai ka kërkuar pezullimin e dënimit të tij me 2 vite burg, me arsyetimin se vuan nga një sëmundje e pashërueshme dhe se izolimi do i sillte pasoja të rënda për shëndetin. Kërkesa e Llallës pritet të merret në shqyrtim në 22 prill, ndërsa mësohet se pjesë e trupës gjykuese janë gjyqtarët; Ilir Panda, Sandër Simoni dhe Sokol Binaj.
Edhe më herët, Llalla e ka përdorur këtë alibi juridike disa herë në gjykatë, deri edhe udhëtimet drejt Italisë para se të jepej vendimi i GJKKO-së, duke dërguar raport në gjykatë se kishte shkuar për kurim jashtë vendit. Ish-kreu i organit qendror të akuzës u shpall fajtor vitin e kaluar
për mosdeklarim dhe fshehje pasurie në 3 episode. Ai akuzohet se nuk ka deklaruar një shumë prej rreth 7 mijë dollarësh për lindjen e djalit, shpenzimet që lidhen me ndërtimin e katit të tretë të një banese, si dhe të ardhurat për shkollimin e vajzës në Gjermani. Ish-Krimet e Rënda dhe më
pas SPAK, e hetuan edhe për akuza më të rënda, si pastrimi i parave, por këto ranë gjatë procesit, për shkak të mungesës së provave. Në përfundim të gjykimit, në shkallët e tjera është vendosur konfiskimi i pasurisë së tij, një apartament në Durrës dhe rreth 22 mijë m2 tokë arë ne periferi të Tiranës. Ndërkohë, Apeli i GJKKO-së, ka përjashtuar ish kryeprokurorin të kryejë funksione publike për 5 vite.
Në prag të marrjes së vendimit të formës së prerë, Llalla mundi të arratisej jashtë vendit, ndërkohë pasi u shpall në kërkim ndërkombëtar u arrestua në Itali në muajin dhjetor të vitit të kaluar, ku në fakt shkoi vetë në Komisariat për kryerje procedurash të kërkesës për azil. Kjo kërkesë deri tani është ende nën verifikim dhe autoritetet mësohet se i kanë mbajtur si ‘kolateral’ pasaportën biometrike ish-kryeprokurorit, që të mos arratiset.
Që nga ajo kohë Adriatik Llalla ndodhet nën mbikëqyrjen e autoriteteve italiane në pritje të vendimit që do të marrë gjykata italiane pas kërkesës së Shqipërisë, që kërkon ekstradimin e tij dhe padisë së tij për persekutim dhe problemeve shëndetësore që ka. Llalla është përfaqëson nivelin më të lartë të një funksioniari shteti të hetuar dhe dënuar me vendim të formës së prerë. Gjithashtu GJKKO i ka sekuestruar edhe 5 pasuri të patundshme Llallës, mes të cilave 4 janë troje në Tiranë dhe një banesë në Durrës.