SPAK po kryen hetime pasurore për ish-ministrin Koka dhe deputetin Bllako, verifikim dhe familjarëve
Prokuroria e Posaçme kërkon informacione shkresore dhe zyrtare nga Kadastra, bankat e nivelit të dytë dhe QKB, për regjistrin e pasurive të patundshme, llogarive bankare dhe subjekteve private që posedojnë ish-zyrtarët e arrestuar dhe të afërm të tyre. Alqi Bllako akuzohet për inceneratorin e Fierit, kurse Lefter Koka edhe për të Elbasanit. Të dy e kanë mohuar akuzën e korrupsionit, por SPAK thotë se dëmi ekonomik është rreth 5 mln euro
Prokuria e Posaçme Antikorrupsion dhe Krimit të Organizuar nisi hetimin pasuror ndaj ish-deputetit të Partisë Socialiste, Alqi Bllako, i cili gjendet i paraburgosur nën masë sigurie “arrest me burg”, për shpërdorim të detyrës, në lidhje me skandalin e inceneratorit të Fierit. Referuar burimeve, krahas procedimit penal në SPAK, ndaj Bllakos po kryhen edhe verifikime përsa i përket pasurisë së tij. Sipas informacioneve në media, përveç sekuestrimit të apartamentit në pronësi të babait të ish- deputetit, me vlerë 140 mijë euro, ekuivalente e dëmit ekonomik të deklaruar nga veprimet administrative të ish-Sekretarit të Përgjithshëm të Ministrisë së Mjedisit, në lupën e SPAK janë vendosur edhe llogaritë e tij bankare.
SPAK po kryen veprime hetimore, ku sipas burimeve të sigurta institucioni i akuzës ka kërkuar informacion në bankat e nivelit të dytëm, për të verifikuar llogaritë bankare, nëse disponon apo jo të tilla Alqi Bllako. Një procedurë standarte juridike kjo që e parashikon ligji në rastet e zyrtarëve apo ish-zyrtarëve të lartë të dyshuar.
Gjithashtu, sipas burimeve pranë SPAK, mësohet se shkresa për të verifikuar pasuritë e Bllakos janë dërguar edhe në institucionet e agjencitë e pronave, Kadastra, për të parë nëse ka pasuri në emër të ish deputetit dhe familjarëve të tij. Gjithashtu edhe në QKB, në lidhje me ndonjë aktivitet biznesi apo subjekt tregtar.
Hetimi pasuror është duke u kryer edhe për ish-ministrin e mjedisit Lefter Koka, ndaj të cilit rëndojnë dy masa arresti me burg, për aferat e inceneratorëve të Fierit dhe Elbasanit. Ky i fundit akuzohet edhe për pastrim parash. Dëmi i cilësuar nga SPAK për biznesmenin ish-deputet të LSI dhe PS, është rreth 5 mln euro.
Burime thonë se e njëjta procedurë po procedohet edhe për ish-ministrin, ku përveç sekuestrimit të kantinës së pijeve alkoolike “Gjergj Skënderbeu” në Durrës dhe katër pronave, po verifikohen edhe llogaritë bankare apo të familjarëve të tij. Sipas SPAK, për aferën e inceneratorëve ai ka përfituar në formën e rryshfetit rreth 3,7 mln euro për inceneratorin e Elbasanit, për të cilin u arrestua më 14 dhjetor dhe 1,2 mln euro për atë të Fierit. Ish-ministri i ka mohuar akuzat herë pas here, duke thënë se nuk ka asnjë përgjegjësi penale apo të ketë marrë para.
SPAK thotë se paratë janë përfituar nëpërmjet firmave fiktive të drejtuara nga të afërm të tij, teksa është paguar për shërbime të pakryera nga koncesionarët e inceneratorëve. Edhe Bllako ka mohuar përgjegjësitë ligjore, duke thënë se ka pasur detyrë vetëm përcjelljen e shkresës në Qeveri për Fierin dhe asnjë kompetencë për ndërhyrje apo çështjet teknike.