Saimir Tahiri dorëzon rekursin: Apeli i GJKKO më dënoi jashtë kompetencave!

Protokollohet në Gjykatën e Lartë rekursi i ish-zyrtarit të lartë socialist, që prej 4 shkurtit po vuan izolimin 3 vite e 4 muaj burg në Fier, për shpërdorim të detyrës, në lidhje me dosjen “Habilaj”. Bashkë me të ankimon edhe ish-kryepolici i Vlorës, Jaeld Çela. Argumenti: “Pezulloni vendimin, është kundër interesave te mia! Gjykata nuk ka vepruar drejt, sepse më ka dënuar jashtë kompetencave të saj”. GJL urdhëroi rigjykimin, por Apeli rëndoi dënimin e parë për të njëjtën vepër, afati i ankimimit të së cilës nga SPAK kishte skaduar

Ish-ministri i Brendshëm, Saimir Tahiri, ka depozituar rekursin në Gjykatë, për pezullimin e dënimit me 3 vite e 4 muaj burg, që i dha më 4 shkurt të këtij viti, Gjykata e Posaçme e Apelit, nga rigjykimi i çështjes së tij, e kërkuar nga Gjykata e Lartë. Sipas Tahirit, vendimi i Apelit është marrë në kundërshtim me ligjin, duke theksuar se jo vetëm është dhënë një dënim më i rëndë nga procesi i parë, ku dënimi me kusht e shërbim prove 3 vite e 4 muaj i është kthyer në izolim në qeli, për akuzën shpërdorim detyre, por edhe faktin se SPAK-u nuk e ankimoi këtë verdikt në Gjykatën e Lartë dhe për këtë vepër nuk mund të ridënohej apo rigjykohej, sepse afatet e ankimimit të Prokurorisë ishin djegur.

“Pezulloni vendimin, është kundër interesave te mia! Gjykata nuk ka vepruar drejt, sepse më ka dënuar jashtë kompetencave të saj”, thuhet në rekursin e Tahirit. “Komunikohet në mënyrë të përmbledhur se, më datë 26.04.2022, në Gjykatën e Posaçme të Apelit për Korrupsionin dhe Krimin e Organizuar, u depozitua dhe u regjistrua rekursi nr. 79, datë 26.04.2022, paraqitur nga i pandehuri S.T., ndaj vendimit nr. 03, datë 04.02.2022 të Gjykatës së Posaçme të Apelit për Korrupsionin dhe Krimin e Organizuar, me të cilin u deklaruan fajtorë të pandehurit S.T., dhe J.Ç., për veprat penale të parashikuara nga nenet 283/a/1, 28/4, 333/a/2 dhe 334/1 të Kodit Penal”, thuhet ne regjistrimin qe gjykata i beri rekursit te Tahirit. Pra bashkë me ish-ministrin, rekurs të njëjtë ka bërë edhe ish-kryepolici i Vlorës, Jaeld Çela, i cili u dënua me 5 vite izolim në total, i kthyer në 3 vite e 4 muaj burg me gjykim të shkurtuar, dhe pas vetëdorëzimit, u lirua pasi e kreu dënimin. Por tashmë kërkon që vendimi të shpallet i padrejtë.

Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, në kuadër të organizatës “Habilaj”, që drejtohej nga kushërinjtë e tij, por u dënua me 5 vjet burg për shpërdorim detyre, dënim i cili u konvertua me 3,4 vjet për shkak të gjykimit të shkurtuar. Edhe në rigjykimin që iu bë,

Apeli theksoi se nuk kishte prova bindëse për akuzat më të rënda që pretendonte SPAK-u.

Edhe Struktura e Posaçme AntiKorrupsion (SPAK) ka dërguar rekurs në Gjykatën e Lartë për ish-Ministrin e Brendshëm, Saimir Tahiri. Mësohet se SPAK-u kërkon dënimin për Tahirin në lidhje me akuzat për trafikun e drogës dhe të grupit të strukturuar kriminal. Ata kërkojnë rigjykim të ish-ministrit për trafik droge e grup kriminal, pasi pretendojnë se ka prova të reja. Tahiri po vuan izolimin në Burgun e Fierit që prej mbrëmjes së 4 shkurtit, kurse Gjykata e Lartë do caktojë datën për shqyrtimin në Kolegj të kërkesës.