“Vjet u bënë rreth 5 mijë përgjime me direktivat e BE. Shumica zyrtarë, por nuk zbuloj emra!”

Kreu i Prokurorisë së Posaçme konfirmoi raportin e publikuar ditë më parë, për shifrat e përgjimeve të vitit të kaluar, se ishin më të larta nga viti 2020. Deklarata: “Janë mjete për sigurimin e provës. Bëhen me direktivat e BE, rekomandohet SPAK-u që të angazhohet për më shumë hetime proaktive. Shumica e çështjeve lidhen me korrupsionin, në parametrave ligjorë që parashikon ligji. Emrat e zyrtarëve janë nga të gjitha nivelet. Hetimet vazhdojnë”

Kreu i Prokurorisë së Posaçme pohoi raportin e publikuar pak ditë më parë, në lidhje me shifrat e përgjimeve të kryera, për të goditur krimin e organizuar dhe korrupsionin e zyrtarëve. Arben Kraja tha se rreth 5 mijë persona, të dyshuar apo që kanë dijeni për vepra të ndryshme penale, janë përgjuar gjatë vitit 2021, një numër ky rekord krahasuar statistikat e viteve të mëparshme.

Lidhur me këtë fakt, kreu i SPAK-ut shpjegoi në një komunikim për mediat ditën e djeshme, se pjesë e listës së personave të përgjuar janë zyrtarë të të gjitha niveleve, ndërsa nuk bëri të ditur asnjë detaj më shumë.

Ai theksoi se shumë çështje lidhen edhe me korrupsionin.

“Janë mjete për sigurimin e provës. Bëhen me direktivat e BE, rekomandohet SPAK-u që të angazhohet për më shumë hetime proaktive. Shumica e çështjeve lidhen me korrupsionin, në parametrave ligjorë që parashikon ligji. Emrat e zyrtarëve janë nga të gjitha nivelet, nuk zbuloj emra, sepse çfarë kuptimi ka. Hetimet vazhdojnë”,

tha Kraja.

Ky numër i regjistruar për vitin që kaloi është më i lartë nga ai 2020, me mbi 1 mijë përgjime. Pjesa më e madhe janë konkluduar me mbi 400 arrestime të bujshme në nivel zyrtar ose të grupit të strukturuar kriminal. Një pjesë e konsiderueshme kanë qenë edhe persona lidhje direkte apo indirekte me të dyshuarit.

Edhe për këtë vit procesi vazhdon, në bashkëpunim me oficerët gjyqësorë dhe organin e ri të zbatimit të ligjit, Byronë Kombëtare të Hetimit, e quajtur ndryshe edhe BKH. Të paktën 15 oficerë përfshihen në përgjime ambientale, telefonike, mbledhje provash dhe dokumentime. Madje është krijuar edhe bërthama e Përgjimeve në Prokurorinë e Posaçme, me ekspertë të fushës.

Sipas raportit zyrtar për rezultatet e vitit të kaluar, vetëm një pjesë e vogël e çështjeve të nisura me përgjime janë pushuar nga prokurorët, për shkak se nuk janë zbuluar prova. Kraja theksoi se të gjitha këto përgjime kanë qenë të ligjshme dhe të justifikuara juridikisht, me leje të GJKKO-së.

Prokuroria e Posaçme ka shpallur procedurën e konkurrimit për tetë vende vakante për Hetues në Sektorin e Hetimit Financiar. Nëpërmjet një njoftimi, SPAK thotë këta hetues do të kenë përgjegjësi të kryejnë verifikime të mjeteve financiare dhe pasurive të personave nën hetim dhe të raportojnë rezultatet tek prokurorët e posaçëm kompetentë. Ndërkohë, sqarohet se në momentin e aplikimit kandidatët duhet të japin pëlqimin për kontrollin periodik të llogarive të tyre bankare dhe telekomunikimeve vetjake. Aplikantët duhet të kenë diplomë në drejtësi, në financë apo në fusha të tjera përkatëse, të lidhura me fushën e hetimeve financiare. Gjithashtu duhet të kenë një eksperiencë pune jo më pak se dy vjet si Oficerë të Policisë Gjyqësore. Të plotësojnë kushtet e sigurisë përpara emërimit në detyrë dhe të kenë plotësuar me sukses procesin e përzgjedhjes sipas procedurës së konkurrimit të organizuar nga Prokuroria e Posaçme. Më pas do t’i nënshtrohen përzgjedhjes që përbëhet nga 4 faza. Afati i aplikimeve dhe dokumentacionit shoqërues përfundon më 12 maj 2022.