Reali feston humbjen me City, në Madrid vetëshpallen të kualifikuar dhe kampionë!

Eufori e tepruar në kryeqytetin spanjoll, panë një tjetër ndeshje nga pjesa tjetër e botës. Superlativa për skuadrën që pësoi 4 gola dhe shënoi 3. Madridi nuk është kualifikuar asnjëherë në histori, kur ka humbur takimin e vajtjes në gjysmëfinale. Këtë ‘hape të hidhur’ e ka provuar edhe Ançeloti. Guardiola dhe City gjithashtu nuk janë përmbysur kurrë kur fitojnë të parën. “The Reds” fituan 2-0 me Villareal dhe kërkojnë finalen e tretë në katër vite

Eufori e tepruar, tituj të tillë gazetash si “të pavdekshëm” apo “s’ka kush i vret” dhe vetëbesim karakteristik prej mitomanësh e tifozësh fanatikë. Kjo është panorama në Spanjë që prej mbrëmjes së martë, teksa u transmetua një tjetër atmosferë nga ajo që pa e gjithë bota në ekran. Edhe pse statistikat i kishte kundër të gjitha, në kryeqytetin e Spanjës kanë nisur festën për ‘kualifikimin’ në finalen e Champions League dhe jo vetëm, sepse titullin e 14-të të kupës me veshë të gjata e konsiderojnë që tani ‘pronë të tyre’. Hipokrizia arriti kulmin pas mbarimit të ndeshjes spektakolare në Angli, me rezultatin 4-3, ku Reali i Madridit mund të thuhet se vetëm “doli i gjallë” nga stadiumi “Etihad”. Analistët dhe mediat pranë Fiorentino Perez nisën ‘ahengun’ dhe euforinë, sikur njerëzit të jetonin para një shekulli, ku s’kishte as televizor dhe as radio. Të përditshmet sportive spanjolle “Marca” dhe “AS”, që konsiderohen edhe si ‘të pavarura’, raportuan vetëm elozhe për ‘lojën e magjishme’ të madrilenëve. A thua se kishin fituar ndeshjen kundr Manchester City. Aq sa topitën edhe analistët e pavarur britanikë, që s’po kuptonin dot se çfarë po ndodhte në pasndeshje, nëse anglezët duhet të hidhëroheshin apo gëzoheshin pse kishin fituar takimin e parë.

E për më tepër një skuadër e drejtuar nga Pep Guardiola, që si para ndeshjes, statistikat i kishte të gjitha në favor dhe parashikimet u konfirmuan në fund. City bëri dyfishin e gjuajtjeve në portën e Kurtua, shpërdoroi shumë dhe shënoi 4, bëri një shtyllë dhe shkaktoi një penallti qesharake. Por loja spektakolare u pa vetëm në një krah, në atë të anglezëve, që mund ta kishin përfunduar edhe me 6 gola takimin. Reali u shfaq vetëm në momentet e caktuara kur rezultati shkonte me plus dy gola për vendasit. Duket se garën e kishin vetëm të shkurtonin diferencën dhe jo të fitonin, pasi nuk kishin as ide, as qetësi, as forcë dhe as teknikë për ta realizuar.

Guardiola i ‘kullufiti’ spanjollët e Ançelotit në të gjitha karakteristikat dhe tashmë këtyre të fundit u ka mbetur vetëm fjala ‘remuntada’ me ndihmën e tifozëve. Dhe tekniku italian, për ironi të fatit, ka vetëm një fitore me Guardiolën, atë që mori kur ishte te Real në sezonin 2013-2014, që fitoi Championsin e 10-të për spanjollët. Por më tej nuk ka parë ‘ditë të bardhë’ ndaj katalanasit. Pep nga ana tjetër me City e ka mundur disa herë Realin dhe kurrë nuk është përmbysur kur i ka fituar të parën, brenda apo jashtë. City e eleminoi në sezonin 2019-2020 Madridin në Champions, madje duke ia fituar ndeshjen e parë në shtëpi. Ançeloti tek Reali nuk ka përmbysur kurrë një takim të humbur në vajtje në gjysmëfinale, kujtojmë me Juventus në sezonin 2014-2015, u rrah 2-1 jashtë dhe barazoi 1-1 brenda. Reali i Madridit nga ana tjetër nuk ka përmbysur kurrë një ndeshje të humbur në takimin e vajtjes në historinë e tij, as me diferencë një gol. Kujtojmë precedentët me Bajern 2011-2012, Borusia Dortmund në 20122013 apo Çelsi më 2020-2021. E megjithatë, arroganca dhe hipokrizia në Madrid janë kthyer në vlerë prej kohësh dhe festimet nisën prej mbrëmjes së martë, edhe pse u mundën. Ançeloti u shpreh në konferencë se është i bindur se ekipi i tij do shkojë në finale dhe do e mundë City, edhe pse me Guardiolën ka 9 humbje në përballje dhe i ka fituar vetëm një. Guardiola nga ana tjetër përgëzoi ekipin e tij për lojën dhe fitoren dhe tha se në ndeshjen e kthimit, që do jetë e vështirë, do të paraqiten njëlloj dhe me objektivin për të fituar. Madrilenët i kanë ende shpresat tek ‘fati’ dhe ‘gjyqtari’, që i kanë ndihmuar mjaftueshëm këtë sezon në Champions, edhe pse kanë zhvilluar lojën më të keqe. Jo vetëm kaq, por në 5 takime të fazës vajtje-ardhje të këtij viti, ka humbur 3, por përsëri pret ‘remuntada’. Nëse Real kalon në finale, do bëhet e 17-ta në histori, kurse për City e dyta dhe për më tepër radhazi, pas asaj që humbën sezonin e kaluar me Chelsea. Ndërkohë që mbrëmë u luajt edhe gjysmëfinalja tjetër mes Liverpoll dhe spanjollëve të Villareal. “The Reds” ishin të pandalshëm në lojën e tyre dhe dominuan në të gjitha aspektet, duke marrë një fitore me shumë rëndësi 2-0 në pjesën e dytë, me një autogol aksidental të Estupinan dhe një perlë të Mane. Me këtë rezultat, anglezët janë pothuajse me një këmbë në finale, (e treta në 4 vite), teksa takimet e kthimit luhen javën e ardhshme.