Inspektoriati i pasurive kallëzoi 518 zyrtarë në shtatë vite, shumë pak dënime
Zyrtarë dhe ish-zyrtarë janë referuar që nga viti 2014 vazhdimisht në Krimet e Rënda, aktualisht SPAK, për pastrim parash dhe fshehje pasurie. Për ironi, edhe ish-kryeprokurori Adriatik Llalla, që duhet t’i hetonte një pjesë, u dënua vetë për fshehje pasurie. Shumë dosje u mbyllën në fshehtësi, emrat të panjohur. Asnjë i dënuar për 2021
Inspektorati i Lartë i Deklarimit dhe Kontrollit të Pasurive, gjatë periudhës 2014-2021, ka kallëzuar penalisht 518 zyrtarë të niveleve të ndryshme për fshehje pasurie, pastrim parash, mashtrim me pasurinë e etj. Kallëzimet janë bërë kryesisht në Prokurorinë e
Tiranës, Prokurorinë e Përgjithshme, në Prokuroritë e Rretheve, dy vitet e fundit në SPAK, në strukturat e hetimit tatimor, në Drejtorisë së Përgjithshme të Parandalimit të Pastrimit të Parave, si dhe në Policisë së Shtetit.
Të dhënat reflektohen në raportin e veprimtarisë së ILDKPKI për vitin 2021, raport i cili do të shqyrtohet nga Kuvendi, anëtarët e të cilit janë vetë subjekte të këtij institucioni kaq të rëndësishëm kundër korrupsionit. “Report TV” vuri në dukje se ILDKP jep numrin e zyrtarëve të kallëzuar, por jo një bilanc se çfarë ka ndodhur me dosjet.
Pothuajse të gjitha dosjet e janë mbyllur në heshtje nga prokuroritë e juridiksionit të zakonshëm dhe Prokuroria e Përgjithshme, me përfundimin e njëjtë: mungesës së konstatimit të elementeve penale.
Mbyllja e dosjeve në heshtje është edhe arsyeja se pse 90 % të emrave zyrtarëve të kallëzuar për fshehje pasurie dhe pastrim parash, mbahen sekret. Si ILDKP, ashtu edhe organi i akuzës, nuk kanë pranuar të japin emrat e zyrtarëve të kallëzuar, me pretendimin se të dhënat përbëjnë sekret hetimor, ndonëse shumica e dosjeve janë mbyllur prej vitesh. Bëhet fjalë për ishministra, deputetë, kryetarë bashkish, drejtorë të rëndësishëm, prokurorë, gjyqtarë, ambasadorë etj.
Kur ILDKP drejtohej nga Adriatik Llalla, i cili si për ironi është dënuar vetë për fshehje pasurie me 2 vite burgim dhe përjashtim me 5 vite nga administrata, akuzonte kryeprokuroren Ina Rama për mbylljen e dosjeve të pasurive. Kur Adriatik Llalla u emërua kryeprokuror në vend të Ina Ramës, vijoi e njëjta praktikë, për të cilën Llalla ishte ankuar kur drejtonte ILDKP. Praktika nuk ndryshoi as pas ardhjes së Arta Markut, pasimit të saj nga Olsian Çelajt dhe ngritjes së SPAK. Goditja pasurive dukshëm të pajustifikuara të zyrtarëve dhe ish-zyrtarëve të lartë në Shqipëri, vijon të mbetet tabu.
Gjatë vitit 2021, SPAK ka regjistruar 14 procedime penale për fshehje dhe refuzim të deklarimit të pasurisë, ku 1 çështje e ka transferuar, 3 i ka pushuar dhe për 10 raste vijojnë hetimet. Ndërsa, Prokuroria e Përgjithshme ka regjistruar vetëm një procedim penal të parashikuar nga neni 257/a i
Kodit Penal; “refuzimi për deklarimin, mosdeklarimi, fshehja, ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”. Në raportin e Prokurorisë së Përgjithshme thuhet ka një tendencë në ulje të kësaj vepra penale. Pra, vetëm 1 procedim përgjatë një viti.