Banorët protestë dhe bllokime: Nuk varrosim dot as të vdekurit, na izoluan!
Tensione në tubimin me bllokim të aksit nga banorët e zonës, që tashmë, për shkak të punimeve të reja të njoftuara nga ARRSH, duhet të lëvizin në segmentin Qafë Kashari-Rrethrrotullimi i “Nënë Terezës”Ahmetaq. Konfrontim dhe me FNSH-të. Paralajmërojnë vijimin e protestës deri në zgjidhje. Akuzat: “Për të blerë një bukë, duhet t’i biem nga Vora. Për 100 metra rrugë, duhet të vijmë rrotull 60 km!”
Banorët e Rinasit u revoltuan dje në një protestë që nisi me motivin paqësor dhe sensibilizues, teksa bllokuan aksin rrugor për në drejtim të aeroportit, si dhe u përplasën me policinë pas vendimit nga ARRSH, se qarkullimi do të realizohej me një sens lëvizjeje, me drejtimin nga Qafë Kashari-Rrethrrotullimi i “Nënë Terezës”Ahmetaq. Është bllokuar për minuta të tëra rruga tek “Ura e Gjolës”, nga 60-70 protestues, që janë banorët të zonës që preken nga ky zhvillim urbanistik, ndërsa kanë mbërritur edhe forca të FNSH-së për të kthyer rendin. Pavarësisht shiut që binte dhe motit të pafavorshëm, banorët u shfaqën këmbëngulës dhe të prerë në kërkesat e tyre, duke paralajmëruar se do të rikthehen sot përsëri.
Mjetet që vijnë nga veriu për në Rinas duhet të ndjekin lëvizjen Fushë KrujëVorë-Qafë Kashar-Aeroport. Kjo është arsyeja përse kanë dalë në protestë, pasi i është zgjatur rruga për të shkuar në punë dhe madje më shumë. Ata thonë se i kanë izoluar dhe nuk shkojnë dot as për të përcjellë në banesën e fundit të afërmit e tyre. Ndërkohë i janë shtuar kostot e përditshme, në një kohë kur çmimet e karburanteve dhe shportës janë rritur.
Banorët qëndruan në rrugë deri në orën 12:00 të mesditës së djeshme, duke u konfrontuar edhe me uniformat blu, ndërsa thanë se nëse nuk ka zgjidhje, do të vijojnë edhe ditët e tjera. Sa i përket prezencës së forcave të policisë, njëri prej protestuesve paralajmëron se do të reagojnë ndryshe
“Për të blerë bukë, duhet t’i biem nga Vora. Nuk çojmë dot fëmijët në shkollë. Unë e kam marrë vesh pardje, nuk dimë asgjë. Nuk ka asnjë rrugë, vetëm nga Fushë-Kruja. Nesër (sot), nga 6 orë do rrimë këtu derisa të hiqen tabelat. Nuk gjendet zgjidhje me këta. Shihe çfarë ka bërë kryeministri jonë. Ne nuk kemi ardhur me shkopa gome. Ne kemi ardhur me duar në xhepa. Nëse njëri nga banorët e Rinasit preket me dorë, atëherë keni për ta parë se kush janë banorët e Rinasit”,
“Për 100 metra rrugë duhet të bëj 60 km, duhet të shkoj në Vorë, në kthesë të Kasharit e të kthehem”,
thotë një tjetër banor. Mjetet që vijnë nga veriu për në Rinas
duhet të ndjekin lëvizjen Fushë Krujë-VorëQafë Kashar-Aeroport. Rruga e njohur si ‘Ura e Hajdutëve’ që të lidh me Kamzën, është bërë me një sens lëvizje dhe banorët e asaj zone që duhet të shkojnë drejt Rinasit apo për të shkuar në autostradë, nuk kalojnë dot aty. Ata duhet të shkojnë tek Ura e Gjolës, më pas tek Fushë-Preza dhe për të kaluar më pas tek rrethrrotullimi i Vorës, për të marrë aksin e autostradës.
Para disa ditësh, ARRSH njoftoi devijimin e lëvizjes drejt aeroportit që nga 1 Maji, për një afat të pacaktuar, pasi ka rritje të fluksit të qarkullimit të automjeteve drejt Aeroportit të Rinasit, pas lirimit të masave anti-COVID.