Ylli Sulaj mbetet në burg pasi mori autorësinë, por kërkon lirimin si i sëmurë: Do operohem!
Çfarë ndodhi dje në seancën te Gjykata e Tiranës. Ylli Sulaj thotë se nëna, motra dhe kushëriri i tij nuk dinin asgjë për shtëpinë katërkatëshe të kthyer në ‘fermë hashashi’. Avokati i cilësoi ndalimet të paligjshme. Dy elektricistët lirohen, thanë se pasi konstatuan konsum me mbi 400 kilovat/orë, denoncuan në Polici. Lirohen dhe nënë e bijë e kushëriri. Ky i fundit u përgjua teksa informonte me kod të dyshuarin Sulaj. U kapën 253 fidanë, llamba, feskuese, mjete dhe prova të tjera
Ktheu shtëpinë në ‘fermë bari’, duke vënë në rrezik edhe nënën, mbetet në burg i dyshuari që mori përsipër autorësinë për kultivimin e kanabisit në Kashar dhe vjedhjen e energjisë elektrike. Gjykata e Tiranës la dje në qeli vetëm një prej 4 familjarëve Sulaj, të arrestuar në lidhje me shtëpinë e barit të zbuluar të premten në periferi. Bëhet fjalë për Ylli Sulajn, i cili mori përsipër edhe përgjegjësinë juridike e penale. Prokuroria e Tiranës kërkoi masën arrest me burg për katër të arrestuarit gjatë operacionit të zhvilluar në “Kashar 2”, ku blutë pas përgjimeve dhe informacioneve operative, kanë zbuluar mbi 200 rrënjë kanabis sativa dhe llamba për ngrohjen e tyre. Prokurori kërkoi masë shtrënguese konkretisht për Ylli Sulaj, Luan Sulaj, Shqipe Sulaj, dhe Xhevrie Sulaj, kjo njëkohësisht kryefamiljarja, rreth 70 vjeçe, ndërsa për dy punonjës të OSHEE, Lufti Basha dhe Rifat Kuçi, u kërkua detyrim paraqitjeje.
Pasi dëgjuan edhe avokatët, në fund të seancës me dyer të mbyllura, togat e zeza liruan Xhevrie Sulajn, duke caktuar ndaj saj masën ‘arrest shtëpie’, për vajzën e saj Shqipe Sulaj, ‘detyrim paraqitjeje’, ndërsa Lufti Basha dhe Rifat Kuçi dhe Luan Sulaj u liruan. Dy punonjësit e OSHEE kanë deklaruar se pasi kanë konstatuar se banesa kishte më shumë 400 kilovatë konsum energjie, kanë sinjalizuar policinë. Avokati i të arrestuarve është shprehur se Shqipja dhe Xhevria banojnë në atë banesë, por s’kanë pasur dijeni për lëndën narkotike, ndërsa shton se Shqipja punon 16 orë në një fasoneri, për të siguruar të ardhura për familjen dhe ska pasur dijeni për aktivitetin.
Sakaq, Ylli Sulaj ka marrë përsipër përgjegjësinë, duke thënë se s’ka dijeni as motra, as nëna dhe as kushëriri i tij. Sulaj ka kërkuar masë më të lehtë sigurie, pasi thotë se vuan nga zemra dhe do t’i nënshtrohet një ndërhyrjeje kirurgjikale.
Për këtë operacion u procedua penalisht në gjendje të lirë dhe do të mbahet nën hetim shtetasi Z. V, kryeplaku i fshatit, për moskallëzim krimi. Prokuroria tha se “ata dyshohen se në bashkëpunim me njëritjetrin në zonën e Kasharit kishin përshtatur katin e dytë dhe të tretë të një vile një banesë të tillë, për të kultivuar bimë narkotike kanabis sativa”. Policia sekuestroi 253 bimë kanabis të kultivuara në vazo, ushqyes elektrikë, llamba elektrike, freskuese dhe 6 aparate celulari”. Kemi veprimtari mjaft të rrezikshme, një ndërtesë 4 katëshe të përshtatur për kultivimin e bimëve narkotike, bashkëpunim, sigurim mjetesh e pajisjesh”, tha prokurori.
Në gjykatë, Ylli Sulaj tha: “Shqipja dhe Xhevria nuk kanë lidhje me këtë çështje. Lidhja e energjisë nga matësi në matës është i lidhur me sahatin. Nuk është lidhje jashtë sahatit”. Ndërsa për faturistin Lufti Basha, avokati tha se ka bërë lexim me korrektesë të sahatit dhe nuk është në detyrën e tij për të parë lidhjen e energjisë, vetëm për të kontrolluar nëse sahati kalon 700 kilovat/ orë. Për elektricistin Rifat Kuçi, avokati tha se detyra e tij nuk lidhet me sahatin matës, por me kontrollin e ndonjë lidhje jashtë sahatit. “Vetëm kur marr urdhër për kontrolle kam për detyrë ta bëj. Vëzhgoj thjesht sahatin”,