Gruaja me dy personalitete aborton fshehurazi, burri zbulon fetusin në valixhe
Bashkëshorti i 40-vjeçares u kthye para një muaji nga Greqia. E shqetësonte era e keqe dhe në dollap zbuloi ngjarjen e frikshme. Denoncon në policinë vendore, nisin hetimet për zbardhjen. E dyshuara dërgohet në maternitet për ekzaminime, prej më shumë se një viti me kartelë si e sëmurë mendore. Ka humbur realitetin dhe mendon se është tjetër person. Nënë e një fëmije 15-vjeçar, që vuan nga autizmi. Priten rezultatet e ekspertimit mjeko-ligjor. Mister kush është babai dhe nëse është abuzuar seksualisht
Gruaja me probleme të shëndetit mendor mbyt foshnjën në fetus dhe e fsheh brenda një valixhe në banesë. Ngjarja horror ndodhi në lagjen nr. 15 të Korçës, teksa ka qenë bashkëshorti i të dyshuarës që bëri zbulimin e frikshëm, teksa gjeti pas erës së rëndë që vinte në shtëpi prej ditësh, edhe fetusin, duke e denoncuar. Kryefamiljari ishte kthyer një muaj më parë nga Greqia, ku shkonte si emigrant ekonomik, teksa i dëshmoi policisë vendore se ai nuk dinte asgjë për shtatzaninë e bashkëshortes dhe se era e keqe e kishte futur në dyshime. E dyshuara 40-vjeçare nuk ka ditur të japë shpjegime, teksa mohon të ishte me barrë apo që fëmija të ishte i saj. Por mjekët thonë se ajo vuan prej kohësh nga probleme mendore dhe trajtohet me medikamente vazhdimisht, ndaj nuk mund të merret prej saj një dëshmi e qartë për rrethanat dhe shkaqet e ngjarjes së frikshme. Policia dhe Prokuroria kanë kërkuar edhe një ekzaminim mjeko-ligjor të fetusit dhe të dyshuarës, për të zbuluar nëse ajo ka qenë vërtetë shtatzënë dhe në cilat rrethana e ka vrarë foshnjën; nëpërmjet një aborti natyral apo të sforcuar në kufijtë e një vepre penale.
Policia vendore tha se ngjarja ka ndodhur në familjen Asimllari në Korçë, teksa mendohet se trupi i foshnjës që ende nuk dihet se sa muajshe mund të ketë qenë, ka pasur mbi një muaj në valixhe.
I shoqi, K.Asimllari, i tha policisë se aroma vinte nga dollapi, por fillimisht nuk ishte në gjendje të përcaktonte shkakun.
Më pas, pas disa kontrolleve, ka gjendur pa jetë foshnjën në një valixhe. Më herët, i shoqi i të dyshuarës për shkakun e ngjarjes, tha se kishte rreth një vit që jetonte jashtë shtetit dhe rrjedhimisht fëmija nuk mund të jetë i tij. Trupi i pajetë i foshjës, po hetohet nga ekspertiza mjeko ligjore. Policia nuk përjashton edhe një abuzim seksual të mundshëm të gruas, e cila nuk është e përgjegjshme për veten. Gruaja nuk është në gjendje të japë detaje mbi ngjarjen, pasi vuan nga probleme mendore, ndërsa djali i tyre 15-vjeçar, që mundet të ketë parë ndonjë skenë të ngjarjes, vuan nga autizmi dhe gjithashtu nuk është në gjendje të japë detaje. Gruaja është transportuar në maternitetin e qytetit, për ekzaminime të mëtejshme, ndërsa policia dhe grupi hetimor po punojnë për zbardhjen e rrethanave të kësaj ngjarjeje të rëndë.
Për mediat, fqinjët konfirmojnë që gruaja ka probleme të shëndetit mendor, por shtojnë se më shumë detaje rreth fëmijës apo shtatzënisë nuk dinë. “Është e sëmurë, shumë e sëmurë. Banon në kat të dytë. Nuk e di a ishte shtatzënë. I shoqi rri në Greqi, edhe erdhi. Vete e vjen, po këtu ishte dje. Ashtu ka qenë ajo edhe më përpara. Ajo ka një djalë, po edhe atë s’e ka mirë,” tregon një e moshuar që jeton në të njëjtin pallat me nënën e fëmijës.