Biznesmeni italian kthehet i penduar: Një ministër shqiptar, garant për trafikun e drogës!
Antonio Guastalegname dëshmon për operacionin antimafia të vitit 2020, i koduar “Rinascita Scott”, mes të cilëve u kapën edhe 8 shqiptarë. Biznesmeni rrëfeu njohjen me shqiptarin Robert Lazaj në avion, garancinë që i dha për miqësinë familjare me një nga ministrat shqiptarë, por pa dhënë emrin e tij dhe saktësi për pozicionin. Zbërthehet dhe linja e trafikut nga Shqipëria e Brazili, me kamionë dhe anije, mes produkteve
Një biznesmen italian është kthyer në të penduarin e drejtësisë kundër organizatës mafioze “Ndragheta”, duke rrëfyer të gjitha linjat e trafikut të narkotikëve dhe armëve, e veçanërisht atë me Shqipërinë. Mediat e vendit fqinj konfirmuan se Antonio Guastalegname është kthyer në bashkëpunëtor të drejtësisë për hetimin e mafies. Duke folur për trafikun e drogës, ai përmendi disa herë Valerio Navarran, i cili konsiderohet nga hetuesit si shumë i afërt me Antonio Giuseppe Accorinti, një prej bosëve të drogës në Toskana.
Sipas të penduarit të drejtësisë, Navarra kishte kontakte me disa trafikantë shqiptarë dhe kishte mbështetjen e qeverisë shqiptare. “Subjekti i korruptuar ishte ministri i Drejtësisë ose i Brendshëm, ose një tjetër figurë e rëndësishme në politikën shqiptare”, shprehet ai. Guastalegname rrëfeu se këtë lidhje e ka mësuar nga një person që quhej Eduard ose Robert, gjatë një udhëtimi në Firence-Bologna. Hetuesit kanë zbuluar se bëhet fjalë për Robert Lazajn, të lindur në Shqipëri në vitin 1972. Dyshimet e tyre janë vërtetuar edhe nga biznesmeni italian, i cili e ka njohur personin në fjalë sapo e ka parë në foto. “E konfirmoj. Ky është personi të cilit i referohesha. Ai është i afërmi i ministrit në qeverinë shqiptare, që ka siguruar mbulimin e këtyre trafiqeve”, shprehet ai. Antonio Guastalegname, i penduari i mafies kalabreze Ndrangheta, ka rrëfyer emra e ngjarje mbi edhe për rrjetin e trafikut të drogës nga Brazili e Shqipëria drejt Italisë.
SHQIPTARËT E ARRESTUAR MË 2020: 1-Orkid Çobaj, 30 vjeç
2-Ydaj Hoxhaj, 31 vjeç
3-Robert Lazaj, 52 vjeç
4-Alfred Lucaj, 43 vjeç
5-Lulëzim Shkurtaj, 35 vjeç
6-Eduart Tahiraj, ose Dhimitër Lutaj, 51 vjeç 7-Floriand Tahiraja, 39 vjeç
8-Lavdosh Serani, 47 vjeç 54-vjeçari, i arrestuar në kuadër të megaporcesit të emërtuar “Rinascita Scott”, flet për lidhjet e bosëve mafiozë të “Ndrangheta”-s, me emra të rëndësishëm të politikës shqiptare.
“Më propozoi të shisja drogë direkt, pa ndërmjetës. Për të më joshur ai më nënvizoi lehtësinë me të cilën ata mund të organizonin transportimin e drogës prej mbështetjes së qeverisë shqiptare, në sajë të së cilës ata mund të përballonin ngarkesa të mëdha pa frikë nga kontrollet”, ka dëshmuar biznesmeni për shqiptarin Lazaj. Sipas Guastalegname, Robert Lazaj i prezantohej si familjar i afërt i ministrit të qeverisë shqiptare e që garantonte sigurinë e këtyre trafiqeve. Nuk dihet se për çfarë periudhe flet dëshmia e të penduarit të drejtësisë dhe as se për cilin ministër shqiptarë.
Në qershor të vitit 2020, autoritetet italiane arritën të goditnin një rrjet të trafikut të drogës nga Brazili dhe Shqipëria drejt Italisë. Në pranga ranë 11 anëtarët të bandës, 8 prej të cilëve ishin shqiptarë. Operacioni i i koduar “Rinascita Scott” çoi në arrestimin e 334 personave, mes të cilëve edhe njerëz të politikës.
Droga vinte përmes Brazilit dhe Shqipërisë nëpërmjet kompanive të import-eksportit për materiale mermeri, niobiumi e mangani dhe shitej më pas në tregjet e zonave të ndryshme italiane. Ndërkohë, klani shqiptar trafikonte marijuanë e hashash nëpërmjet portit të Barit në Itali, nga një grup trafikantësh që jetonin në Toskana.