Në kërkim nga Spanja për narkotrafik, Gjykata bllokon përkohësisht ekstradimin e biznesmenit Nikolin Janina, do pritet dosja e plotë
Gjykata e Posaçme i jep kohë biznesmenit Nikolin Janina, teksa bllokoi përkohësisht çështjen e ekstradimit të tij drejt Spanjës, ku akuzohet për narkotrafik. Biznesmeni shqiptar, i njohur si pronari i linjës “Porcelanosa”, i shpallur në kërkim nga autoritetet spanjolle prej disa vitesh, është lënë në burg të përkohshëm nga gjykata, duke mos u ekstraduar menjëherë. Gjykata ka vendosur që Janina të qëndrojë i izoluar në vendin tonë deri në mbërritjen e dosjes së plotë nga Spanja.
Janina u arrestua ditën e premte për llogari të drejtësisë spanjolle, ndërsa akuzohet si kreu i një grupi të strukturuar kriminal që tregton lëndë narkotike, heroinë, morfinë dhe opium në disa vende të Bashkimit Europian. Janina e mbulonte aktivitetin e tij kriminal me një kompani hidrosanitaresh në vendin tonë, ndërsa po ashtu kishte dhe një sërë pasurish, të cilat i janë sekuestruar nga drejtësia. Bëhet fjalë për një linjë të gjerë asetesh e llogarish, me vlerë që shkon në 4 mln euro, tashmë nën procedim pasuror nga shteti dhe të bllokuara.
Nga ana tjetër, drejtësia spanjolle e ka proceduar në 15 prill 2016 me nxjerrjen e emrit të biznesmenit Nikolin Janina, në listën e personave të shpallur në kërkim ndërkombëtar. Tashmë që dy vendet kanë nënshkruar edhe marrëveshjet e ekstradimit mes tyre, Policia dhe Interpol Tirana kanë nisur një valë të gjerë arrestimesh për personat e kërkuar në vendin iberik, kryesisht për çështje narkotrafiku apo grabitje të vilave luksoze. Vetëm javën e kapuar janë arrestuar të paktën 7 persona vetëm për llogari të autoriteteve spanjolle.