Vdekja e punëtorit në kantierin e ndërtimit në Spitallë, familjarët: Shkak mungesa e kushteve të sigurisë në punë, e deklaruan dhe aksident!
Mungesa e kushteve teknike në punë, dyshohet se i ka marrë jetën një tjetër punëtori. Genci Spaho, 51-vjeç, babai i dy vajzave, ishte duke punuar në një kantier ndërtimi në zonën e Spitallës në Durrës, ku po ndërtohen shtëpi të banorëve të prekur nga tërmeti i 26 nëntorit. 51-vjeçari fillimisht u dërgua për mjekim në spitalin e Durrësit, por më pas u dërgua në spitalin e Traumës, ku edhe ndërroi jetën mbrëmjen e së shtunës. Në kartelën e vdekjes së punëtorit, është shënuar sikur 51-vjeçari ka humbur jetën si pasojë e një aksidenti, por familjarët pretendojnë se ka vdekur teksa po punonte, si pasojë e mungesës së kushteve teknike. Familjarët kërkuan hetimin e plotë të ngjarjes dhe nxjerrjen e përgjegjësive.
Ata denoncojnë se fillimisht u tha se Genci ra nga skelat, por në vendngjarje nuk ka pasur të tilla. “I ndjeri punonte në ndërtim. Kishte shumë vite që punon në ndërtim aktualisht në këtë kantier ku ka ndodhur tragjedia ka rreth 3 javë. Nuk besoj se kishte
kushte pune. Nuk është se kam pasur ndonjë siguri apo ndonjë kusht. Kur ka ndodh aksidenti më ka marrë në telefon një koleg i tij dhe na ka thënë ka rënë nga skela. Ato thanë ka rënë nga skela, ky ishte versioni i parë, por nga informacionet që kam unë nuk ka pasur skela. Doktori na tha se ishte në gjendje të rëndë. Përpjekja e mjekëve ka qenë maksimale, deri në fund dhe ka ndërruar jetë pasdite. Që nga dje, nuk kemi pasur asnjë lloj komunikate as nga policia dhe as nga firma kontraktore”, u shpreh i afërmi i tij. Për këtë ngjarje Drejtoria Vendore e Policisë së qytetit të Durrësit, ka arrestuar shtetasit Leonart Pule, Enea Xoxi dhe Rauf Kaçi, për veprën penale “shkelja e rregullave të mbrojtjes në punë”.