MSH: Regjistrohen vetëm 6 raste të reja me koronavirus në vend

Ndonëse janë kryer mbi 400 testime tek rastet e dyshuara për Covid-19, autoritetet e shëndetit publik kanë bërë me dije se pozitivë me koronavirus kanë rezultuar vetëm 6 pacientë në të gjithë vendin, teksa fatmirësisht nuk është regjistruar asnjë humbje jete.

Në përditësimin e të dhënave për treguesit epidemiologjik, Ministria e Shëndetësisë dhe Mbrojtjes Sociale ka konfirmuar se për 24 orët e shkuara në të gjithë vendin janë kryer 407 testime, nga të cilat kanë rezultuar pozitivë me koronavirus 6 qytetarë, në këto bashki: 3 qytetarë në Tiranë, 1 në Fier, Delvinë,

Vlorë. Janë 258 qytetarë aktivë me Covid-19 në gjithë vendin. Aktualisht në spitalin Covid-3 po marrin trajtim 7 pacientë. Në 24 orët e fundit nuk ka asnjë humbje jete me Sars-Cov2, ndërkohë që janë shëruar 34 qytetarë, duke e çuar numrin e të shëruarve në 271,617 që nga fillimi i epidemisë.

Ministria e Shëndetësisë dhe Mbrojtjes Sociale u bën apel qytetarëve të vaksinohen sa më parë, për të mbrojtur veten dhe shëndetin e të tjerëve. Vaksinat antiCovid reduktojnë mundësinë e infektimit dhe shmangin në shkallë të lartë hospitalizimet dhe fatalitetet.

Çdo qytetar mbi 12 vjeç, mund të vaksinohet në qendrat shëndetësore. Po ashtu, të gjithë qytetarët e vaksinuar me dy doza, duhet të drejtohen në qendrat shëndetësore, ose pikat e vaksinimit të përqëndruar, për t’u vaksinuar me dozën e tretë përforcuese. Qytetarët mbi 60 vjeç dhe ata me imunitet të dobët, që kanë kaluar 4-6 muaj nga kryerja e dozës së tretë, mund të marrin dozën e katërt të vaksinës anticovid, sipas rekomandimit të mjekut të familjes.

Nëse dyshoni se jeni të prekur nga Covid-19 apo keni shenja të sëmundjes, izolohuni menjëherë dhe kontaktoni me mjekun tuaj të familjes për t’u testuar sa më parë ose telefononi Urgjencën Kombëtare në numrin unik 127.