Vettingu largon një tjetër magjistrat nga sistemi, shkarkohet prokurori i Gjirokastrës
Pas disa seancave, KPK mori dje vendimin për shkarkim të prokurorit Emror Kasaj. Raportet e DSIK, verifikimet ekonomike për një shtëpi me vlerë 300 mijë euro, huatë dhe disa nga dosjet “e nxehta”, penalizuan magjistratin. Çfarë i gjeti Komisioni dhe si u shpjegua prokurori. Si kërkoi lirimin e Erigers Mihasit në vitin 2019, i cili u vra vitin e kaluar në atentat te “Astiri”
Pasuria e pajustifikuar dhe disa nga dosjet e lakuara më herët gjatë karrierës, largojnë nga sistemi i drejtësisë një tjetër magjistrat. Komisioni i Pavarur i Kualifikimit ka shkarkuar dje nga detyra Prokurorin e Gjirokastrës, Emror Kasaj. Nga analiza financiare paraprake për periudhën 2010-2016, Kasaj rezulton me balancë negative në vlerën e 31 milionë lekëve. Drejtoria e Sigurimit të Informacionit të Klasifikuar, DSIK, ka konstatuar fillimisht përshtatshmërinë e prokurorit Kasaj për të vazhduar detyrën. Pas përditësimit të raportit janë referuar informacione për përfshirjen e tij në korrupsion pasiv dhe për ndikim të paligjshëm në një proces penal.
Prokurori Emror Kasaj u përball me Vettingun me 17 mars, për vlerësimin e ligjshmërisë së pasurisë dhe kriterin etik dhe profesional. Emror Kasaj e ka nisur karrierën në sistemin e drejtësisë në vitin 2000, si oficer i Policisë Gjyqësore. Prej vitit 2015,i ushtron funksionin e prokurorit në Prokurorinë e Rrethit Gjirokastër. Kasaj e ka mohuar se burimet e pasurisë janë të paqarta apo të paligjshme dhe se nuk ka kryer shkelje në karrierën e tij.
Magjistrati u përball për herë të dytë më 5 maj në KPK, lidhur me problemet në kriterin e figurës dhe profesionalizmit. Komisioni i Vettingut, duke iu referuar dokumenteve, kontratave dhe përplasjeve gjyqësore, ka konstatuar se vlera e pronës bashkë me ndërtesën ishte 300 mijë euro dhe jo 5 milionë lekë sa e kishte deklaruar Kasaj. Në përgjigjen e tij para Komisionit të Vettingut, prokurori i Gjirokastrës pranoi mospërputhjen, ndërsa tha se i kishte marrë 140 mijë euro hua pa interes biznesmenit Shkëlqim Fusha. Kasaj tha se një pjesë e parave, 90 mijë euro, i kishte marrë cash te ish-hotel “Sheraton”, ndërsa pjesën tjetër prej 50 mijë eurosh në një moment të dytë. Në deklaratën e pasurisë, nuk figuron një hua e tillë. Prokurori Kasaj deklaron vetëm një hua pa interes në vlerën 4,3 mijë euro. Ndërkaq, raporti mes biznesmenit dhe magjistratit është konsideruar si i papërshtatshëm dhe si një sjellje e papapajtueshme me detyrën nga ana e KPK-së. Komisioni i Vettingut ka konstatuar se Emror Kasaj kishte hetuar një çështje penale që lanë dyshime në vendimmarrje.
Në muajin korrik të vitit 2019, prokurori i Gjirokastrës liroi nga qelia Erigers Mihasin, i cili u ekzekutua bashkë me shokun e tij Armando Dumani, më 13 nëntor 2021, në zonën e “Astirit” në Tiranë. Mihasi ishte arrestuar në 22 janar 2019, si i dyshuar për ngjarjen e rëndë të 30 marsit 2015, ku një grup personash grabitën me armë banesën në Tepelenë të Elton Çiçës, duke i dhunuar rëndë dy prindërit e tij. Pas lirimit në 2019, në mars të vitit 2021, prokurori i Gjirokastrës Emror Kasaj ka kërkuar që të pushohet çështja penale ndaj Mihasit, kërkesë e cila u refuzuar nga gjykata, e cila urdhëroi thellimin e hetimeve.