Skandali me inceneratorin e Fierit, më 17 maj mbahet seanca në Apel për ish-ministrin Lefter Koka dhe 4 ish-zyrtarët e tjerë, kërkojnë lirimin

Ish-ministri i Mjedisit Lefter Koka, ish-zyrtarët Arenc Myrtezani, Sabina Cenameri, Pëllumb Abeshi dhe Etleva Kondi, do të kërkojnë në Apel zhbërjen e masës së sigurisë të marrë ndaj tyre nga shkalla e parë e GJKKO, për akuzat për çështjen e Inceneratorit të Fierit. Seanca është përcaktuar më datë 17 maj. “Komunikohet në mënyrë të përmbledhur se, çështja me objekt “ankim ndaj vendimit të caktimit të masës së sigurimit personal, në ngarkim të personave nën hetim A.M., S.C., P.A., L.K., E.K., është regjistruar pranë Gjykatës së Posaçme të Apelit për Korrupsionin dhe Krimin e Organizuar, më datë 10.05.2022, me nr. 14 regjistri themeltar. Sipas shortit të ditës së sotme, kjo çështje do të shqyrtohet nga trupi gjykues monokratik i përbërë nga gjyqtarja Iliriana Olldashi, në seancën gjyqësore të planifikuar më datë 17 Maj 2022, ora 11:00”, thuhet në njoftimin zyrtar të GJKKO. Jo vetëm në Inceneratorin e Elbasanit, por edhe në atë të Fierit sipas Prokurorisë së Posaçme Kundër Korrupsionit dhe Krimit të Organizuar (SPAK) janë shkelur procedurat për dhënien e koncesioneve por edhe janë konsumuar vepra penale nga zyrtarë deri të nivelit më të lartë. Rreth 5 milionë euro pasuri e sekuestruar (1,2 Lefter Kokës, 2 milionë euro në Elbasan dhe 140 mijë euro babait të ish-deputetit Alqi Bllako) dhe 9 masa të tjera arresti për Fierin dhe 5 për Elbasanit, ishte bilanci i fundit SPAK. Ata akuzohen se kanë tjetërsuar truallin në Fier dhe falsifikuar dokumentet, sikurse edhe kanë përfituar ryshfete për rastin e Elbasanit. Ish-ministri akuzohet se mori rreth 3,7 mln euro ryshfet për inceneratorin e Elbasanit, nga dy biznesmenët po nën akuzë.