Akuzohet se grabiti shtëpinë e Benzema dhe 39 të tjera, burg për ekstradim ish-drejtorit të Ujësjellësit
Alfred Prodani do të qëndrojë në paraburgim për 40 ditë, afat i caktuar ligjërisht për ardhjen e dosjes nga Madridi, me qëllim ekstradimin. U ndalua në kuadër të operacionit të koduar “La Coruna”, se gjatë vitit 2013 dhe në vijim, ka qenë pjesë e një grupi plaçkitësish, përfshi edhe shtëpinë e yllit të Realit. Avokati kërkoi masë të butë
Gjykata e Kurbinit miraton ekstradimin drejt Spanjës ndaj ish-drejtorit të Ujësjellësit të këtij rrethi, duke dhënë masën “arrest me burg”, me afat 40 ditë për Alfred Prodanin. Trupa gjykuese i dha kohë Ministrisë së Drejtësisë dhe Interpol Tiranës që të përgatisin dosjen bashkë me autoritetet spanjolle dhe nëse nuk respektohet ky afat dhe Interpol Madridi nuk sjell letër-porosinë, atëherë ekstradimi do të dështojë. Ish-zyrtari 41-vjeçar rezulton të jetë në kërkim ndërkombëtar që nga viti 2013, për “vjedhje me dhunë” në Spanjë. Është i paqartë fakti sesi ai nuk është kapur deri tani, madje ishte në krye të Ujësjellësit të Kurbinit.
Alfred Prodani është denoncuar tre vite më parë nga ish-kryeministri Sali Berisha, se ka marrë pjesë në grabitjen e shtëpisë së sulmuesit të Realit të Madridit, Karim Benzema. Sipas autoriteteve, Prodani rezulton i përfshirë në rreth 40 episode vjedhje të banesave në Spanjë. Edhe mediat sportive spanjolle i kanë kushtuar vëmendje këtij operacioni, duke rikthyer rastin e plaçkitjes së vilës së Benzema, gjatë një ndeshjeje “El Clasico”, me Barcelonën. Prodani doli këtë të martë para Gjykatës së Kurbinit, ku u njoh me masën e sigurisë, teksa avokati e kundërshtoi, duke deklaruar se nuk ka as prova dhe as kërkesë. Gjyqtari Aurel Arapi, pranoi kërkesën e prokurorit Arben Nika dhe e cilësoi të ligjshëm ndalimin e 41-vjeçarit, duke vendosur ndaj tij caktimin e masës së sigurisë “arrest në burg” me afat 40 ditor. Avokati Edmond Buna kërkoi një masë më te butë ndaj klientit të tij, me pretendimin se bëhet fjalë për një urdhër arresti të lëshuar në vitin 2013, kohë nuk kishte marrëveshje ekstradimi me Shqipërinë dhe po ashtu nuk është paraqitur asnjë proces që e implikon Prodanin për veprën penale që akuzohet.
Sipas njoftimit zyrtar: “Operacioni policor i koduar “Coruna” u finalizua mbrëmjen e së premtes nga forcat policore të Komisariatit të Policisë Kurbin, në bashkëpunim me INTERPOL Tirana. 41-vjeçari banues në Kurbin, u prangos pa bërë rezistence në qytetin e Laçit, ndërsa ndalimi i tij u bë me qëllim ekstradimi drejt Spanjës. Ai ishte shpallur në kërkim, pasi Gjykata Coruna/ Spanjë, në vitin 2013, ka lëshuar urdhër arresti ndërkombëtar, për veprën penale “vjedhja me dhunë”, parashikuar nga Kodi Penal i Spanjës”. Prodani akuzohet se rezulton i përfshirë në rreth 40 grabitje në seri të banesave dhe vilave në Spanjë. Kur ish-kryeministri Berisha e akuzoi në vitin 2019, Prodani i quajti akuzat si të stisura dhe të motivuara politikisht. Prej 9-vitesh Alfred Prodani mbante postin e Drejtorit të Ujësjellës-Kanalizime në Kurbin, si përfaqësues i Partisë Socialiste.