Prokuroria kërkon burgosje, Sulejmani mbrohet: S’jam i droguar, bëj palestër! Frenat s’mbajtën, isha me 40 km/h
Shoferi i proceduar tetë herë radhazi nga Policia Rrugore për shkelje të rënda, mohon që të ketë qenë i droguar në timon në momentin kur mesditën e së dielës shtypi çiftin Konomi dhe foshnjën 3-muajshe të tyre, teksa kalonin vizat e bardha te “Rruga e Kavajës”. Ajas Konomi, për të cilin prokuroria kërkon izolimin në paraburgim si përsëritës dhe për shkak të aksidentimit të një familjeje, mes tyre dhe një fëmijë të mitur, pretendon se në momentin e fundit s’i mbajtën frenat. Por hetuesit e konsiderojnë alibinë jo të qëndrueshme, për shkak se makina fuoristradë është luksoze, markë e prodhimit të fundit “G-Class”. Gjithashtu Ajazi ka thënë se ai po udhëtonte vetëm me 40 km në orë, teksa pritet të mbërrijë e plotë edhe ekspertiza auto-teknike, për ta dërguar në Gjykatë. 39-vjeçari udhëtonte me të bijën e mitur në makinë në momentin e aksidentit dramatik dhe Policia thotë se nga testi që iu bë, rezultoi konsumator i lëndëve narkotike kanabis sativa. Fakt që Ajazi e kontestoi fortë, edhe pse më parë ka qenë i dyshuar si përdorues dhe shpërndarës i tyre, brenda vendit dhe deri në SHBA. Masa e sigurisë i është caktuar gjyqtares Rexhina Merlika. Vendimi pritet të merret në dhomën gjyqësore për të miturit, meqenëse i lënduar nga aksidenti ka mbetur edhe një e mitur tre muaj. Prokuroria ka kërkuar ‘arrest me burg’ për 39-vjeçarin, ndërsa do të përballet me një sërë akuzash ai shkelje e rregullave të qarkullimit me pasojë, drejtim te automjeteve në mënyre te parregullt nën ndikimin e drogës si dhe largim nga vendi i aksidentit. Policia Rrugore ia ka hequr patentën për 2 vite dhe i vendosi 105 mijë lekë gjobë. “Nuk kam qenë shpejt. Kam qenë me 40 km/h. Nuk kam faj, nuk punuan frenat e sistemi frenimit. Testi i drogës s’është real, më bëni analiza gjaku. S’përdor kurrë drogë në jetën time, për më tepër merrem me sport e palestër. Nuk u largova nga vendi aksidentit, çova vajzën në spital të dëmtuarit i ndihmuan kalimtarët. Skam asgjë tjetër për të deklaruar”, mësohet se ka thënë ai. Fuoristrada me shpejtësi, në semafor të kuq dhe të vizat e bardha, përplasi çiftin Vilma dhe Arjan Konomi, zyrtar i Ministrisë së Arsimit dhe mjeke e Shëndetësisë, si dhe foshnjën e tyre të sapolindur, teksa u plagosën rëndë prindërit. Tashmë gjendja e tyre është e stabilizuar, teksa skena e ngjarjes ishte një panik i vërtetë për kalimtarët, teksa autori i dyshuar arratisej me vrap, me vajzën e tij në krahë. Sulejmani ka qenë i shpallur në kërkim në vitin 2014 nga autoritetet amerikane, pasi akuzohej për trafikim të lëndëve narkotike. Ende nuk dihet nëse Sulejmani e ka mbyllur këtë çështje me drejtësinë amerikane.