Qeveria miratoi dje vendimin për kodifikimin e programeve të studimit
CILËSIA NË ARSIMIN E LARTË
Qeveria ka miratuar në mbledhjen e radhës të zhvilluar ditën e djeshme edhe vendimin për kodifikimin e programeve të studimit. Kodifikimi nënkupton organizimin apo grupimin e programeve të studimit në kode që identifikojnë fusha të ngjashme në të gjitha institucionet e arsimit të lartë në vend.
Sipas autoriteteve të arsimit, kodifikimi i programeve të studimit është një detyrim që rrjedh nga ligji për Arsimin e Lartë, por edhe nga strategjia kombëtare 2021-2026. Në daljen publike pas miratimit të vendimit, ministrja e Arsimit dhe Sportit, Evis kushi ka bërë me dije se sipas ligjit të gjitha programet e studimit që ofrohen në fusha të ngjashme në të njëjtin cikël dhe që kanë të njëjtin emërtim, duhet të jenë patjetër të ngjashme së paku në 70 për qind të tyre.
“Kodifikimi është një vendim që i vjen në ndihmë të gjitha institucioneve, duke nisur nga vetë universitetet të cilat do të kenë mundësinë të përmirësojnë apo rrisin koherencën e tyre akademike, duke i menaxhuar dhe planifikuar më mirë ofertën kurrikulare. Ndërkohë përfitojnë edhe institucionet politikëbërëse, siç është Ministria e Arsimit apo edhe ASCAP, sepse nëpërmjet kodifikimit do të kenë mundësi të bëjnë një analizë dhe një menaxhim më të mirë duke patur të dhëna të unifikuara midis universiteteve për sa i takon programeve të studimit.
Natyrisht, përfitojnë edhe vetë studentët, sepse do të jenë më të qartë jo vetëm kur bëjnë zgjedhjen e programeve të studimit por edhe kur bëjnë transferimin e studimeve nga një universitet në tjetrin, duke shmangur të gjitha ato problematika apo konfuzionin që kanë patur në vitet e kaluara”, bëri me dije ministrja Kushi. Sipas saj, kodifikimin është konsultuar në detaje me të gjitha universitetet nëpërmjet konferencës së rektorëve dhe për realizimin e saj i është referuar sistemit të ISCED i cili është programi për kodifikimin e programeve. Ky vendim është një tjetër hap për rritjen e cilësisë në universitetet tona.