Lame: Ndjesë qytetarëve, denonconi edhe tek unë! Kemi marrë 100 masa ndëshkuese
Korrupsioni në Sarandë / Pas publikimit të investigimit nga “STOP”, policia i vë prangat ish-kreut të Legalizimeve, sot në Arshivën e Kadastrës në rreth, Laert Pasha. I kërkoi pronarit të hotelit 4 mijë euro për hipotekën e hotelit. Artan Lame thekson se ka raste sporadike, por abuzimet po goditen dhe shërbimi është përmirësuar: “Në Sarandë janë larguar nga puna 8 punonjës, janë kallëzuar në Prokurori 8 raste abuzimesh dhe janë marrë mbi 100 masa ndaj punonjësve. Zyrtarëve u them mos e merrni veten në qafë dhe të josheni nga shuku i parave!”
Specialistët e Hetimit të Krimit në Komisariatin e Policisë Sarandë, pas transmetimit në emisionin investigativ “Stop”, të denoncimit të një rasti korruptiv në Kadastrën e Sarandës, bënë ndalimin me iniciativë të zyrtarit Laert Pasha, 41 vjeç. Pasha është banues në qytetin bregdetar, me detyrë specialist i Sportelit dhe Arkivës në Zyrat e ASHK. Ai dyshohet se ka konsumuar elemente të veprës penale “korrupsioni pasiv i personave që ushtrojnë funksione publike”. Rasti u denoncua, pasi një pronari hoteli në Sarandë, i kishin premtuar legalizimin përmes korrupsionit me vlerë 4 mijë euro.
Prej 3 vitesh, denoncuesi kishte mbajtur kontakte me Laert Pashën, ish-drejtorin e Legalizimit, që tani punonte në Kadastër e që këtë herë i kërkoi 4000 euro për nxjerrjen e hipotekës së hotelit. Menjëherë pas aksionit të Policisë së Vlorës, ka reaguar edhe drejtori i Përgjithshëm i Kadastrës, Artan Lame, që u ka kërkuar falje qytetarëve për rastin. Lame tha se ka ende raste të tilla abuzimesh, ndërsa shtoi se qytetarët të ankohen kur kanë të drejtë edhe në drejtoritë rajonale, ose tek vetë ai në Tiranë. Lame gjithashtu nxiti qytetarët që t’i denoncojnë të gjitha rastet abuzive dhe falenderoi mediat.
“Mund të them se duhet të jesh tërësish idiot për të mos kuptuar se ç’po bëhet vitet e fundit, në luftën kundër korrupsionit. Është rast i veçuar dhe jo i përhapur. Mund të them shumë gjëra të këtij lloji, por nuk do e them. Do i kërkoj ndjesë shqiptarëve në emër të institucionit që drejtoj. Do i kërkoj ndjesë edhe punonjësve të ndershëm të Kadastrës. Falenderime i shkojnë edhe mediave. Kjo për faktin se mikrofoni mbërrin edhe atje kur dora ime nuk mbërrin. E them këtë, sepse nuk vihen në diskutim përpjekjet tona në këtë drejtim. Vitet e fundit në Sarandë janë larguar nga puna 8 punonjës. Ju nuk më keni parë të dal e të mburrem për shifra. Unë mundohem t’i largoj vetë personat problematikë. Janë kallëzuar në prokurori 8 raste abuzimesh. Janë marrë mbi 100 masa ndaj punonjësve. Të gjithë ne që nga unë, punojmë në një sektor të paragjykuar. Jemi të paragjykuar se punojmë në një sektor me risk të madh. Po përpiqemi të vendosim rregullin. Jemi të paragjykuar se punonjësit janë dhe produkt i ambientit kur jetojmë të gjithë. Ajo që po ndodh me shërbimet online është epokale”, tha Lame. Më tej iu referua edhe punës së bërë ndër vite nga institucioni për rritjen e cilësisë së shërbimit, duke lëshuar edhe paralajmërime për vartësit.
“Po ndryshon si nata me ditën shpejtësia e shërbimeve. I drejtohem edhe njëherë veç e veç punonjësve të Kadastrës. Mos e merrni veten në qafë dhe të josheni nga shuku i parave. I drejtohem qytetarëve. Kini besim te Kadastra e Shqiptare, nëse gjendeni në situata si ajo e djeshmja kërkoni me forcë të drejtën tuaj, ose në drejtorinë rajonale, ose te unë në Tiranë”,