Arben Kraja në KLP: Prokurorët janë të pavarur, e dinim që do kishim presione!
Kreu i SPAK mban larg polemikat dhe politikën, pas deklaratave të forta të kryeministrit për moshetimin e “Non Grata”-ve. Debate të forta edhe në mbledhje me nënkryetarin e KLP, që hodhi dyshime për shfryrje operacionesh nga SPAK. Kraja për gazetarët: “Thirrjet e Ramës? Nuk kam asnjë koment. Jo, nuk ndihemi të intimiduar, po punojmë normalisht, të gjithë prokurorët dhe gjyqtarët!”
Drejtuesi i Prokurorisë së Posaçme, Arben Kraja, reagoi publikisht dje duke shfrytëzuar raportimin përpara Këshillit të Lartë të Prokurorisë, në lidhje me ‘furtunën’ e krijuar së fundmi, pas deklaratave të kryeministrit Edi Rama, se SPAK po godet vetëm në krahun e qeverisë dhe jo në atë të ish-zyrtarëve të djathtë. Kreu i Prokurorisë së Posaçme u shpreh se ishte i ndërgjegjshëm që në fillim se do të kishte presione në punë, megjithatë deklaroi se kishte porositur prokurorët të ishin të qetë dhe të mbledhin provat për të kryer siç duhet punën. Kjo do të ishte një deklaratë e zakonshme e punës së prokurorëve.
“Të gjithë prokurorët e hetuesit janë të ndërgjegjshëm kë hetojmë, e dimë që do ketë opinione të ndryshme, presione. E rëndësishme për ne të jemi korrekt me ligjin, të vlerësojmë provat. Këto u kam thënë edhe prokurorëve, të vijojnë punët me provat, nuk është problem shqetësues për ne”, tha Kraja. Në një seancë dëgjimore në Këshillin e Lartë të Prokurorisë për raportin e punës së SPAK gjatë vitit 2021, të hapur për mediat, Arben Kraja u tregua më i qartë në qëndrime, se sa në përgjigjet që i dha
gazetarëve pas mbledhjes.
“Thirrjet e Ramës? Nuk kam asnjë koment. Jo, nuk ndihemi të intimiduar, po punojmë normalisht, të gjithë prokurorët dhe gjyqtarët. Në vazhdojmë punën tone”, deklaroi Kraja.
Në mbledhje nuk munguan tensionet. Nënkryetari i Këshillit të Lartë të Prokurorisë Tartar Bazaj e pyeti Krajën pse shfryhen operacionet nga grupe të strukturuara kriminale në shpërdorim detyre. Kreu i SPAK nuk e priti mirë pyetjen, por e sfidoi. “SPAK nuk ka nisur asnjë hetim për shpërdorim detyre, nëse ju më thoni një rast unë japë dorëheqjen. Kemi sekuestruar 70 milionë euro nga asete kriminale. Nuk ka të drejtë KLP të kontrollojë punën e SPAK për çështje konkrete. Nuk do të keni mundësi t’i shihni asnjëherë, nuk është detyra juaj”, deklaroi Kraja.
Mbledhja e raportimit për veprimtarinë e SPAK u shoqërua jo pak edhe me ironi mes Arben Krajës dhe anëtarëve të KLP. Disa herë iu kërkua kreut të SPAK të vlerësonte punën e tij, por ai e cilësoi absurde, e megjithatë foli në emër të të gjithë grupit, ku nuk munguan vlerësimet për prokurorët e oficerët e Byrosë Kombëtare të Hetimit.