“Saranda në Prishtinë”: Pa kosovarët, turizmi në Shqipëri në ngërç të pakthyeshëm
Është mbajtur takim mes përfaqësuesve të hoteleve dhe kompanive turistike nga Saranda dhe atyre nga Kosova, me sloganin “Saranda në Prishtinë”.
Saranda tashmë është një nga destinacionet më të pëlqyera të qytetarëve të Kosovës, në rivierën shqiptare. E pikërisht Saranda me drejtuesit e saj lokalë e me përfaqësues biznesesh kanë prezantuar ofertën turistike për këtë sezon në Prishtinë.
Ditë me parë është mbajtur takimi në mes të përfaqësuesve të hoteleve dhe kompanive turistike nga Saranda dhe atyre nga Kosova, me sloganin “Saranda në Prishtinë”.
Kryetari i Bashkisë së Sarandës, Adrian Gurma ka thënë se pa turistët e Kosovës, turizmi i Shqipërisë do të ishte futur në ngërç të pakthyeshëm.
Ai për të joshur qytetarët nga Kosova, tha se Saranda mbetet “mbretëreshë” e turizmit në Shqipëri.
“Pa pushuesit nga Kosova, jam i bindur se turizmi do të ishte kthyer në një ngërç të pakthyeshëm…Shqipëria është e bukur, secila pjesë e bregdetit ka veçoritë e veta, por unë sot në cilësinë e e kryetarit të Sarandës, ftoj qytetarët e Kosovës që të zgjedhin Sarandën për pushime, sepse Saranda është mbretëresha e turizmit”, theksoi Gurma.
Nikoqiri i këtij takimi, kryetari i Odës Ekonomike të Kosovës, Berat Rukiqi ka kërkuar bashkëpunim jo vetëm në fushën e turizmit me Shqipërinë, por edhe në sektorë të tjerë ekonomikë.
“Ne dëshirojmë që jo vetëm gjatë sezonit, por edhe në stinët tjera me pasur më shumë produkte të Kosovës në Shqipëri, por edhe anasjelltas. Kjo do ta forconte më tepër bashkëpunimin, njëkohësisht edhe prezencën tonë atje, por edhe prezencën e juaj në Kosovë. Gjithashtu, ne dëshirojmë të shohim më shumë flukse në të dyja anët e kufirit, por sa më pak pritje në pikat kufitare”, tha Rukqi. Ambasadori i Shqipërisë në Prishtinë, Qemal Minxhozi potencoi se është rritur numri i qytetarëve të Kosovës që kanë blerë banesa në Sarandë.