Hetimi i fondeve të BE-së, kryeprokurori Çela merr pjesë në Rrjetin Europian
Po zhvillohet në Vjenë të Austrisë, Konferenca e 13-ë e Rrjetit të Prokurorëve Europianë, ku i pranishëm është edhe Olsian Çela. Njoftohet se çështja kryesore e diskutimit mbetet bashkëpunimi më i fortë i Prokurorit Publik Europian, me prokuroritë ndërkombëtare. Kjo zyrë heton dhe ushtron ndjekjen penale për krime që kryhen kundër buxhetit të BE si mashtrimi, korrupsioni etj. Mbështetje edhe ndaj Ukrainës me asistencë në hetime. Dënohen krimet e Rusisë
Prokurori i Përgithshëm, Olsian Çela, po merr pjesë në konferencën e 13-ë të Rjetit të Prokurorëve Europianë (Nadal), që po zhvillohet në Vjenë, Austri.
Çështje kryesore e konferencës është bashkëpunimi mes Zyrës së Prokurorit Publik Europian dhe prokurorive ndërkombëtare. Kjo zyrë heton dhe ushtron ndjekjen penale për krime që kryhen kundër buxhetit të BE si mashtrimi, korrupsioni etj.
Krijimi i kësaj zyre përbën një hap të rëndësishëm përpara në krijimin e një zone të përbashkët të drejtësisë penale në Bashkimin Europian.
“Prokurori i Përgjithshëm e vlerëson nisjen e bashkëpunimit me Zyrën e Prokurorit Publik Europian, si hap në rrugën e duhur në procesin e integrimit të vendit në BE”, thuhet në njoftimin zyrtar. Objektiv gjithsesi u theksua se mbetet verifikimi dhe gjurmimi i të gjitha operacioneve administrative dhe dokumentare për shpenzimin e fondeve të dhëna nga BE për vendet anëtare ose jo, pasi mund të shpërdorohen apo të vidhen nëpërmjet skemave të ndryshme. BE jep herë pas here fonde në fusha të ndryshme edhe për Shqipërinë dhe ka raste të shumta kur ka pasur denoncime apo dyshime për shpërdorim të tyre. Në konferencë u miratua edhe një deklaratë, përmes së cilës u shpreh shqetësimi dhe solidariteti me Ukrainën dhe popullin ukrainas, si dhe u dënua agresioni rus dhe krimet e rënda që janë kryer atje. Anëtarët e rrjetit u angazhuan që brenda kompetencave të tyre ligjore, të mbështesin autoritetet ukrainase në mbledhjen dhe sigurimin e provave, si dhe në hetimin dhe ndjekjen penale të krimeve të rënda të kryera në kuadër të konfliktit të armatosur.