6 në 10 familje nuk kursejnë dot, vetëm 38% munden, me kursimet që shkojnë për pleqërinë
Nga këto të dhëna rezulton se, familjet me 3 anëtarë kursejnë më shumë se të tjerat, ndërsa ato me vetëm një anëtar kursejnë më pak.
Thuajse 6 në 10 familje shqiptare nuk mund të kursejnë, tregojnë të dhënat më të fundit nga një vrojtim i Bankës së Shqipërisë, por që i referohet periudhës para krizave, pra në vitet 2018-2019. Kështu, shifrat tregojnë se 62% e familjeve në vendin tonë nuk kursejnë, dhe vetëm 38% mund t`ia dalin.
Pavarësisht se konteksti i këtyre shifrave është jashtë aktualitetit të kohës ku gjendemi, japin një panoramë të qartë të normalitetit të familjeve shqiptare. Nga këto të dhëna rezulton gjithashtu se, familjet me 3 anëtare kursejnë më shumë se të tjerat, ndërsa ato me vetëm një anëtar kursejnë më pak.
Ndër familjet me të ardhurat më të ulta, që përbëjnë 20% të familjeve në total, 83% e tyre nuk arrijnë të kursejnë, ndërkohë që ndër familjet më të pasura, që përbëjnë gjithashtu rreth 20% të totalit, 57% e tyre ja dalin të kursejnë. Gjithashtu, të dhënat e vrojtimit të Bankës së Shqipërisë tregojnë se, familjet ku kryefamiljari (personi i referencës) është deri në moshën 34 vjeç, kanë më shumë gjasa të kursejnë, ndërsa familjet ku kryefamiljari është mbi 75 vjeç kanë më pak gjasa të kursejnë. Referuar statusit të punësimit të kryefamiljarit, në rast se është i punësuar, gjasat për kursim janë më të larta, ndërkohë që gjasat më të vogla janë në ato familje ku kryefamiljari është i papunë, si dhe pensionist.
Sa i përket edukimit, familjet me kryefamiljarin me arsim të lartë kanë thuajse dy herë më shumë gjasa të kursejnë se ato ku kryefamiljari është vetëm me arsim fillor, 59% kundrejt 30%.