Ryshfetet në Doganën e Morinës, Apeli lë në qeli 15 nga policët kufitarë
Shkalla e dytë la në fuqi masat e të parës, të marra më 10 prill. Efektivët akuzohen se lejonin mallra dhe njerëz që të kalonin drejt Kosovës dhe anasjelltas, kundrejt pagesave deri në 100 euro dhe fitimeve deri në 8 mijë euro në ditë. Filmime dhe përgjime. 14 mbeten në “arrest shtëpie” dhe 4 të pezulluar nga detyra. Pas skandalit, kryepolici Nano urdhëroi pajisjen e kabinave me kamera sigurie
Më datë 10 prill shkalla e parë e GJKKO, në një seancë që zgjati rreth 5 orë, vendosi që të lërë në burg 15 efektivë që u arrestuan nga super operacioni kundër korrupsionit në doganën e Morinës në Kukës. Ndërkohë që 14 janë lënë në “arrest shtëpie”, e 4 të tjerë u pezulluan nga detyra. Të njëjtat masa janë konfirmuar dje nga Apeli i GJKKO, i cili ka lënë në fuqi masën e shkallës së parë.
31 efektivët e Doganës së Morinës u arrestuan të premten e datës 8 prill dhe akuzohen nga SPAK se për muaj të tërë u kanë mundësuar dhjetëra qytetarëve shqiptarë dhe kosovarë, kalimin kufitar në mënyrë të parregullt, për ç’ka dhe kanë pranuar si ryshfet shuma të konsiderueshme të parave. Gjithashtu u dyshuan për lejimin e makinave të trafikuara apo vjedhura, klandestinëve nga vendet e treta dhe raste të tjera penale.
SPAK ka në dosje edhe pamje filmike dhe përgjime që faktojnë aktivitetin e dyshimtë të efektivëve nën akuzë. I njëjti operacion i koduar “Pika” u krye edhe në pjesën kosovare të doganës, me mbi 20 policë vendas të ndaluar dhe proceduar.
Nga hetimi janë dokumentuar 312 episode të veprimeve korruptive të punonjësve të policisë, të cilët favorizonin persona të ndryshëm për futjen e mallrave kontrabandë; persona që trafikonin automjete, sende të tjera të kundraligjshme; ndihmonin për të kaluar kufirin persona të ndryshëm me problematika ligjore për hyrjen dhe daljen e tyre ne vendet e BE-së, sa i përket regjistrimeve fiktive për hyrjen dhe daljen në territorin shqiptar; si dhe ndihmonin persona të tjerë që kishin probleme me ligjin, të cilët nuk regjistroheshin në sistemin TIMS, pasi nuk lejohej udhëtimi i tyre për në Kosovë dhe anasjelltas.
Në media u publikua edhe video e efektivëve të arrestuar, ku pamjet tregonin mënyrën sesi grumbulloheshin dhe ndaheshin paratë ndërmjet efektivëve. Njëra nga efektivet shihet duke numëruar ryshfetin që ka përftuar nga qytetarët duke shpërdoruar detyrën, ndërsa monitorimi i tyre është kryer nga kamera përgjimi, të vendosura nga prokuroria. Nga hetimi ka rezultuar se policët i merrnin qytetarëve minimalisht nga 10-100 euro, për vepra të ndryshme penale, si kontrabanda, sende të tjera të kundraligjshme etj, të cilat i ndanin më pas me njëri tjetrin në fund të turnit. Fitimet shkonin deri në 8 mijë euro në ditë.
Pas këtij skandali, kryepolici Gledis Nano, urdhëroi që tashmë çdo kabinë në kufi të jetë e pajisur me kamera sigurie. Vendimi është firmosur nga Drejtori i Përgjithshëm i Policisë së Shtetit, për të monitoruar çdo veprim që kryejnë policët dhe për të shmangur korrupsionin.