Këputet kabulli i ashensorit te QSUT, lëndohen pacientja dhe barrelmbajtësi. Nën akuzë tekniku dhe administratori i firmës

Një incident kritik ndodhi mbrëmjen e së dielës, në ambientet e Qendrës Spitalore Universitare “Nënë tereza” në Tiranë. Në urgjencën e sëmundjeve të brendshme, gjatë transportit të një pacienteje për kryerjen e ekzaminimeve radiologjike, ka ndodhur aksidenti në një prej ashensorëve, që u bllokua. Pacientja me inicialet V.C., e shoqëruar nga infermieri dhe barrelambajtësi, në dalje nga ashensori, patën lëndime së bashku me barrelambajtësin K.D., si pasojë e një defekti të ashensorit. Infermieri dhe stafi mjekësor i kanë dhënë menjëherë ndihmën e nevojshme pacientes dhe barrelambajtësit. Më pas pacientja u konsultua nga specialistët për këtë lëndim, si dhe vijoi konsultat dhe ekzaminimet për sëmundjen dhe pas kryerjes së skanerit me kontrast, rezultoi me tromboemboli pulmonare, diagnozë për të cilën është në mbikëqyrjen e ekipit mjekësor. QSUT informon se të gjithë ashensorët janë në një sistem mirëmbajtje të plotë nga kompania e kontraktuar për shërbimin e mirëmbajtjes, të cilat kryhen periodikisht, sipas kontratës në fuqi. Pritet ekspertiza e mëtejshme për të vlerësuar shkakun e këtij incidenti. Policia e Tiranës dhe Komisariati nr. 4 njoftuan se nisi hetimet paraprake dhe ka vënë në hetim teknikun Ermal Braja, 45 vjeç dhe administratorin e firmës së ashensorit Ardjan Sulollari, 52 vjeç, për ngjarjen e regjistruar në QSUT, për “shkelja e rregullave të mbrojtjes në punë”. Ashensorit pritet t’i bëhet ekspertiza e plotë për të zbardhur shkaqet. Si pasojë e rënies është këputur njëra prej kavove, pasi ashensori në momentin e dëmtimit ka qenë në ngjitje. Materialet i kaluan Prokurorisë, për veprime të mëtejshme procedurale.