Dumani u dha prokurorëve ‘thesarin’ e karteleve, aplikacionin e koduar “Matrix”
I njëjtë me “Encro Chat” që u zbulua në aksin Holandë-Belgjikë tre vite më parë, si dhe tek grupet shqipfolëse kohët e fundit, edhe “Matrix”, shërbente për të dërguar dhe lexuar mesazhe të koduara nga 8 krerët e organizatave të goditura, me 32 të akuzuar. SPAK ka në dorë një ‘minierë’ të tërë me prova, të dyshuarit rrezikojnë deri dënime të përjetshme
Nuredin Dumani tregon me detaje se si ka organizuar vrasjet me anëtarët e bandës së tij, duke zbuluar edhe mënyrën e komunikimit. Teksa fliste për atentatin ndaj drejtorit të shkollës, biznesmenin Lulzim Masha, te liqeni në Tiranë, Dumani tregoi se bandat përdorin aplikaconin “Matrix” për të shkëmbyer mesazhe me njëri-tjetrin. Nëse aplikacioni “Matrix” arrin të konfigurohet në celular, bisedat mes bandave mund të kodohen dhe i lexon vetëm dërguesi apo marrësi, nëse nuk hakohen apo investigohen me pajisje të sofistikuara kibernetike, siç ndodhi me aplikacionin “Encro Chat” në aksin Belgjikë-Holandë, nga u goditën dhjetëra kartele narkotrafiku e krimesh të ndryshme. Tashmë prokurorët kanë në dorë një ‘thesar’të vërtetë hetimor, pasi me zbërthimin dhe çkodimin e aplikacioneve, kanë gjetur si prova materiale të gjitha bisedat, porositë, datat, vendet, emrat e implikuar, shënjestrat, porositësit dhe detaje të tjera të rëndësishme, që i kanë ‘betonuar’ me vendim të Gjykatës Speciale dhe janë të pandryshueshme më tej. Këto do i kushtojnë nga 15 deri në burgime përjetë të dyshuarve të dosjes së bujshme, në varësi të veprave penale, që nisin me grup të strukturuar kriminal, financim të vrasjeve, tentativa, pagesa, armëmbajtje pa leje, kanosje etj.
Edhe thyerja e aplikacionit të komunikimit “Sky ECC” nga policia, ka sjellë një numër të lartë arrestimesh në të gjithë Ballkanin dhe të gjithë botën. Pjesë e këtyre arrestimeve kanë qenë qindra shqiptarë, që nga Britania e Madhe, Belgjika, Holanada etj., e deri në Amerikën Latine.
Dy të penduar të drejtësisë, Nuredin Dumani dhe Henrik Hoxha nga qelia, zbërthejnë vrasjet nga grupet e organizuara kriminale të një dekade nga viti 2011 deri në 2022-shin. Prokuroria e Posaçme kundër Krimit të Organizuar dhe Korrupsionit, pas 6 muajve hetime dhe me dëshmitë kyçe të dy personave tashmë të vënë në dispozicion të drejtësisë, ka bashkuar 18 dosje penale në një të vetme, në atë të Dumanit dhe Hoxhës, regjistruar në 14 prill 2022 për vrasje mbetur në tentativë, armëmbajtje pa leje në formën e grupit të strukturuar kriminal dhe përkrahje e autorit.
Me vendim nga Gjykata Kundër Krimit të Organizuar dhe Korrupsionit u lëshuan 32 urdhër arreste, nga të cilat 18 u ekzekutuan nga policia (prej të cilave 9 masa iu komunikuan persona të arrestuar për vepra të tjera penale), ndërsa 14 janë ende në kërkim. Operacioni i koduar “Golden bullet”, ka nisur menjëherë pas arrestimit të shumë të kërkuarit Nuredin Dumani, i cili u arrestua gjatë operacionit policor të koduar “Arratia”.
Me vendim nga Gjykata Kundër Krimit të Organizuar dhe Korrupsionit u lëshuan 32 urdhër arreste, nga të cilat 18 u ekzekutuan nga policia (prej të cilave 9 masa iu komunikuan persona të arrestuar për vepra të tjera penale), ndërsa 14 janë ende në kërkim.
Nuredin Dumani i konsideruar një nga personazhet më të kërkuar të botës së krimit, u arrestua në Fier më 29 mars 2022 pas një tentativë të dështuar për të vrarë Talo Çelën. Bashkë me të, u vu në pranga ushtari i tij, Henrik Hoxhaj, që e ndihmoi në arratinë e shkurtër. Dëshmitë e tyre dhe provat e gjetura në telefonin e Dumanit që mbeti i plagosur në Elbasan, ndihmuan SPAK në zbërthimin e grupeve kriminale. Hetimet që zbërthyen vrasjet e bujshme në Shqipëri po drejtohet nga Byroja Kombëtare e Hetimit, Policia e Shtetit dhe dy prokurorë të SPAK, Dolorez Musabelliu dhe Behar Dibra.