‘Bëmat’ e Nuredin Dumanit dhe “ushtarit” Henrik Hoxhaj: Mbi 10 vrasje e atentate, grabitje dhe hedhje në erë
Mbi një dekadë me krime e dyshes së vrasësve me pagesë, në trekëndëshin Tiranë-DurrësElbasan. Nga vrasjet te grupi i strukturuar kriminal, mbi 10 grabitje, kanosje, sulme, plagosje, tentativa dhe vendosje eksplozivi. Lista e plotë e krimeve, shënjestrat, vendet dhe koha
Nuredin Dumani, një nga emrat më të përfolur të botës së krimit dhe Henrik Hoxhaj, dy të penduar të drejtësisë, tashmë të arrestuar prej mbrëmjes së 29 marsit në Fier, në operacionin e koduar “Arratia”, akuzohen për një sërë veprash penale të rënda, por do përfitojnë juridikisht nga statusi që kanë si bashkëpunëtorë të drejtësisë, ku pritet t’i shpëtojnë në radhë të parë burgimit të përjetshëm, të jenë të siguruar e të mbrojtur ata vetë e familjet.
SPAK njoftoi edhe listën me krimet e secilit prej tyre rezpektivisht dhe veprat. Nuredin Dumani i dyshuar për kryerjen e veprave penale si më poshtë, së bashku me ndihmësin e tij Henrik Hoxhaj, ky i dënuar më parë për “moskallëzim krimi” dhe “armëmbajtje pa leje”, aktualisht i paraburgosur për një vepër tjetër penale, i dyshuar për kryerjen e veprave penale të:
“Vrasje me paramendim”, e kryer për interes dhe me pagesë, në dëm të viktimës Fatmira Habili (Dedaj), finalizuar në datën 14 gusht 2013 në qytetin e Durrësit, kryer në bashkëpunim të veçantë, atë të grupit të strukturuar kriminal, “prodhimi, mbajtja, blerja apo shitja pa leje e armëve të ftohta”, në formën e mbajtjes, “grupi i strukturuar kriminal” dhe “kryerja e veprave penale nga grupi i strukturuar kriminal dhe organizata kriminale”. “Vrasje me paramendim” dhe të tjera, në dëm të viktimës Emiljano Ramazani, më datë 20
Korrik 2020, në lagje “28 Nëntori”, Elbasan. Vrasja në dëm të viktimës Bujar Çela, e kryer në datën 17 gusht 2020, në Elbasan, tentativa e vrasjes së biznesmenit Lulzim Masha, e ndodhur në Tiranë. “Mbajtja pa leje dhe prodhimi i armëve, armëve shpërthyese dhe i municionit”, “sigurimi i kushteve dhe i mjeteve materiale për të kryer vrasje”, në dëm të shtetasit Indrit Dokle, kryer në bashkëpunimin e posaçëm të grupit të strukturuar kriminal, “grupi i strukturuar kriminal”, “kryerja e veprave penale nga grupi i strukturuar kriminal dhe organizata kriminale”. “Shkatërrim i pronës me eksploziv” në dëm të banesës së shtetasit Talo Çela (ndodhur në datën 5 nëntor 2020), “dhuna në familje” në dëm të shtetases Blerta Bengasi (Ruçi), kryer në bashkëpunimin e posaçëm në formën e grupit të strukturuar kriminal, “vjedhje me dhunë” në dëm të shtetasit Hamdi Sharka, ndodhur në fshatin Polizhan të Beratit, tentativa për vrasje e Sokol Sanxhaktarit, e kryer në bashkëpunimin e posaçëm të grupit të strukturuar kriminal, “grupi i strukturuar kriminal”, “kryerja e veprave penale nga grupi i strukturuar kriminal dhe organizata kriminale”. “Shkatërrim i pronës me eksploziv” në dëm të shtetasit Mustafa Subashi, (ngjarje e ndodhur në Durrës në datën 29.01.2020), “sigurimi i kushteve dhe i mjeteve materiale për të kryer vrasje”, në dëm të shtetasit Elton Kila (i thirrur Oti), kryer në bashkëpunimin, “vrasja me paramendim”, për motiv hakmarrjeje, e mbetur në tentative, në dëm të shtetasit Arben Çeta (ngjarje e ndodhur në datën 14.11.2013 në qytetin e Elbasanit), “vjedhje me dhunë”, kryer në bashkëpunim në formën e posaçme të grupit të strukturuar kriminal, në dëm të argjendarit Lirak Bajraktari, në Elbasan. “Vjedhje me dhunë”, në dëm të shtetasit Shyqyri Shala, e kryer në datën 13.02.2012 në qytetin e Kavajës, “vjedhje me dhunë” në dëm të shtetasit Hamit Haxhia, e kryer në datën 11.02.2013 në qytetin e Durrësit, “vjedhjes me armë në bashkëpunim”, në dëm të shtetasit Xhemali Liçi (ngjarje e ndodhur në datën 19.12.2012 në qytetin e Elbasanit), “vjedhje me dhunë”, në dëm të shtetasit Astrit Ademi, kryer në datën 17.06.2013, në Maminas të Vorës. Henrik Hoxhaj e Dumani kanë përsipër edhe “vrasja me paramendim e mbetur në tentative”, në dëm të viktimës së veprës penale Filip Gjeloshi, ngjarje e datës 05.02.2011 në qytetin e Tiranës, “vrasja në rrethana te tjera cilësuese”, ndaj dy ose më shumë personave, e kryer më shumë se një herë, në dëm të viktimave Dorjan Shkoza e Anxhelo Avdia, më 2 mars 2020) dhe në dëm të viktimave Besmir Haxhia e Viktor Haxhia, më 27 prill 2020 në Durrës.