Studimi: Fëmijët kalojnë më shumë kohë para ekranit pas pandemisë. Prindërit të shqetësuar
Në SHBA, pas pandemisë, fëmijët po përdorin më shumë telefona inteligjentë, rrjete sociale dhe video lojëra. Është ky përfundimi i një studimi të Qendrës Kërkimore Pew (Pew Research Center), i kryer në një kampion prej gati 1700 prindërish amerikanë, i cili krahasoi zakonet e fëmijëve nën 11 vjeç në mars 2020 dhe në prill 2021. Studimi zbuloi gjithashtu se, pas Covid-it, shumë më tepër prindër besojnë se fëmijët e tyre kalojnë shumë kohë para ekranit.
Në mesin e fëmijëve amerikanë nën moshën 11 vjeç, përdorimi i mediave sociale është rritur, veçanërisht TikTok, i përdorur nga 21% e të anketuarve në vitin 2021 krahasuar me 13% në
2020, por edhe i tabletave të përdorura përkatësisht nga 81% e fëmijëve, kundrejt 68% në 2020 dhe lojërave video, të përdorura përkatësisht nga
51%, kundrejt 45% në 2020. Ajo që bie në sy është edhe një e dhënë për fëmijët shumë të vegjël. Në vitin 2021, pothuajse 7 nga 10 fëmijë nën moshën pesë vjeç përdornin rregullisht tabletin, ndërsa 3 nga 10 luanin videolojëra.
Ekziston edhe tendenca e kundërt, pasi 14% e fëmijëve nën 11 vjeç që përdorën një smartphone në 2020, nuk e përdornin më atë në 2021. Në mënyrë të ngjashme, 19% e atyre që kaluan kohë duke luajtur video lojëra në 2020 nuk e bënë më këtë në 2021.
Ndërgjegjësimi dhe shqetësimi për shumë orë të kaluara para ekranit po rritet edhe te prindërit. Nëse në vitin 2020, 31% e prindërve deklaruan se fëmija i tyre kalonte shumë kohë duke luajtur videolojëra, në vitin 2021 përqindja u rrit në 51%. E njëjta gjë vlen edhe për smartfonin, përdorimi i të cilit në 2021 ishte i tepruar për 4 në 10 prindër, krahasuar me 3 nga 10 në 2020.
Kalimi i tepërt i kohës para ekranit nuk është i shëndetshëm, sepse sipas një studimi kanadez, përdorimi i telefonave inteligjentë dhe tabletëve do të ngadalësonte të mësuarit njohës të fëmijëve, edhe nëse është e rëndësishme të merret parasysh cilësia e kohës së shpenzuar. Tendenca për të ekzagjeruar ekzistonte edhe para pandemisë. Sipas një studimi që analizoi zakonet e 4000 fëmijëve midis viteve 2008 dhe 2010, në tri vitet e para të jetës koha e kaluar para ekranit do të rritej në mënyrë eksponenciale, nga më pak se një orë deri në dy orë e gjysmë në ditë. Pandemia, bashkëpunëtore në punën në distancë, shkollat e mbyllura dhe pamundësia për të dalë nga shtëpia, vetëm sa ka rritur përdorimin e ekranit, një thikë me dy presa për prindërit e stresuar të ndarë mes familjes dhe punës.