Burg policit që ekzekutoi kolegun, Gjykata urdhëron ekspertim psikik. Avokati: E pranoi, merrte qetësues!
Gjykata e Tiranës vlerësoi të ligjshëm ndalimin, por kërkoi një diagnozë shkencore për problemet e Ludjan Zaimit, pasi iu gjetën në banesë antidepresantë të fortë “Seroquel”, që merren për skizofreni dhe bipolaritet. Mund të jenë shkaku i efekteve anësore në haluçinacione. I dyshuari i qëndron versionit se Çaush Saliasi e tallte dhe shante vazhdimisht. Avokati Gorishti: Ishte i tronditur, kanë pasur marrëdhënie shoqërore, nuk e dha motivin, por e pranoi krimin dhe se merrte qetësues para ngjarjes!
Një efektiv policie prej më shumë se dy dekadash në radhët blu humbi jetën nga dora e kolegut të tij, teksa ky i fundit tashmë rezulton se ishte person me probleme të shëndetit mendor! Ludjan Zaimi, 25-vjeç, ka zgjedhur që të heshtë, duke thënë vetëm pak fjalë për pohimin e autorësisë për ekzekutimin e kolegut Çaush Saliasi brenda Komisariatit nr. 3 pse e tallte, kurse Gjykata e Tiranës i ka dhënë masën “arrest me burg”. Por detaji më interesant i seancës me dyer të mbyllura ishte urdhri i Gjykatës që polici rishtar t’i nënshtrohet ekzaminimeve psikike nga ekspertët e Neurologjisë, pasi ka prova se vuante nga depresioni dhe kurohej me medikamente, që mund të jenë bërë edhe shkak i nxitjes në krimin e rëndë si pasojë e bipolaritetit apo haluçinacioneve që jepnin ilaçet si efekte dytësore.
Pikëpyetja më e madhe për hetuesit është mënyra se si është rekrutuar Zaimi në radhët e policisë, prej sa kohësh vuante nga probleme të depresionit dhe kujt i kishte treguar për to, apo nëse mjekohej fshehurazi. Kolegët e kujtojnë si një person me humor të paqëndrueshëm dhe herë pas here i tensionuar. Por nga ana tjetër, edhe viktima 55-vjeçar duket se ‘i binte më qafë’ më shumë se ç’duhej, kurse përplasjet mes tyre çuditërisht nuk ishin raportuar te shefat e komisariatit, që duhet të kishin ndërhyrë për ta parandaluar, ose të paktën t’i ndanin në makina dhe turne të ndryshëm efektivët sherrxhinj. Zaimi ka qenë i qetë dhe kokëulur në kafaz, teksa avokati kërkoi masë të butë për shkak të diagnozës së klientit të tij dhe provokimeve të vazhdueshme nga viktima.
Avokati Edvis Gorishti, ka shtuar në një prononcim për mediat pas seancës, se i riu e ka pranuar krimin që ka kryer, por nuk ka dhënë asnjë shkak për ngjarjen. Avokati tha se klienti i tij ka treguar që merrte qetësues në kohën para se të ndodhte krimi.
“Pretendimi gjatë seancës, qëndrimi i tij është se e ka pranuar e ka bërë veprën e ka qenë në momentet e tronditjes emocionale. Tha madje tha që kishte marrë dhe disa qetësues gjatë periudhës që ka qenë para veprës. Seanca ishte shumë e shkurtër. Nuk e përcaktoi, por tha që merrte qetësues gjatë kohës përpara domethënë. Akuza e ngritur është vrasje me dashje”, tha Gorishti
mediat. për
Gjykatësi Sokol Pasha ka kërkuar gjithashtu edhe një ekspertizë mjekoligjore të autorit, kjo sepse gjatë kontrollit në banesë, atij iu gjetën anti- depresantë “Seroquel”, medikament që përdoret për të kuruar skizofreninë, çrregullime bipolare, si dhe për probleme të tjera të rënda mendore.
Në deklarimin e tij të shkurtër para trupës gjyqësore, avokati e konfirmoi se klienti i tij ka treguar që merrte qetësues në kohën para se të ndodhte krimi. Hetuesit mendojnë se 25-vjeçari kishte ditë që e planifikonte diçka të tillë dhe po gjente momentin që Saliasi ta ngacmonte përsëri duke e sharë nga familja apo tallur.
Pasi i ka thënë kolegut që ndodhej pranë që të ulej, zbrazi si në një aksion lufte gjashtë plumbat e pistoletës së shërbimit, i vendosur për ta vrarë Saliasin, edhe siç u pa nga pamjet filmike. Kishte menduar edhe arratisjen, por pa sukses. Zaimi i qëndron shkakut se Saliasi dehej shpesh në alkool, e tallte si “qorr” dhe e shante nga nëna, derisa situata u bë e patolerueshme. “Pretendimi gjatë seancës, qëndrimi i tij është se e ka pranuar e ka bërë veprën e ka qenë në momentet e tronditjes emocionale, se kanë pasur e marrëdhënie shoqërore bashkë. Për momentin nuk e tha se pse, ishte shumë i tronditur”, tha avokati.
Nga ana tjetër, po kryhet edhe një hetim nga Agjencia e Mbikëqyrjes Policore (ishSHÇBA), që po kryen verifikime, pasi dyshohet se Komisariati kishte dijeni për një marrëdhënie jo korrekte mes tyre, teksa sa i përket përgjegjësive për atë që ndodhi në brenda Komisariatit Nr.3, do të jenë hetimet dhe një vendimmarrje e drejtorisë së Kontrollit të standarde nëse do të ketë pezullime apo edhe shkarkime në këtë Komisariat Ngjarja e rëndë ndodhi mbrëmjen e 23 majit, teksa po ndërroheshin turnet dhe në sallë ishin edhe 5 kolegë të tjerë. Kolegëve të tij u ishte shprehur se “ia kishte prerë biletën për stadium Çaushit”, duke nënkuptuar krimin që kreu më pas.
Zaimi ka 1 vit e gjysmë në Policinë e Shtetit, është arrestuar dhe akuzohet për kryerjen e veprës penale “vrasje me paramendim”, e ndërsa viktima Çaush Saliasi kishte mbi 20 vite karrierë me uniformat blu.