Ambasada e SHBA-ve zbulon se ishin 2 policët e plagosur. Njëri ra në greminë duke kërkuar parcela hashashi, tjetri duke e ndihmuar ta nxirrte
Dy efektivë policie rezulton se kanë rrezikuar jetën në malësinë e thepisur të Dukagjinit, në operacion kundër parcelave të hashashit, teksa u rrëzuan në greminën e zonës ditën e shtunë. Zyrtarisht u raportua se u dëmtua rëndë Rrok Frroku, 54 vjeç, që u nxorr pas një operacioni me grupe kërkim-shpëtimi për disa orë dhe transportua me ndihmën e helikopterit të KFOR-it në spital për mjekim. Por në një njoftim të Ambasadës Amerikane zbulohet një detaj i ri, se nuk ka qenë efektivi i vetëm i cili ra mbeti i plagosur gjatë operacionit. Dëmtime mori edhe një polic tjetër, i cili gjatë tentativës për t’i ardhur në ndihmë kolegut të tij, ka mbetur i lënduar edhe vetë. Një fakt i tillë është bërë i ditur nga ambasada e SHBAsë, e cila teksa pasqyron ndihmën e dhënë nga helikopteri i KFOR, sqaron se drejt spitalit të Traumës janë shoqëruar 2 policë shqiptarë dhe jo vetëm Rrok Frroku. “Pas një kërkese për ndihmë nga autoritetet shqiptare për evakuimin mjekësor të dy policëve shqiptarë, të cilët pësuan një aksident të rëndë në një rajon malor në veri të Shqipërisë, Misioni i KFORit i udhëhequr nga NATO dërgoi në vendin e aksidentit një helikopter nga Trupa e Aviacionit Lindor të Komandës Rajonale të KFOR-it. Ekuipazhi mjekësor i evakuimit, me ndihmën performancës së lartë të helikopterit Black Haëk në shpëtimin me ngritje, nxori në mënyrë të sigurt dy oficerët e plagosur të policisë dhe më pas u dha ndihmë mjekësore. Pas stabilizimit, personeli i plagosur është transportuar në spitalin e Tiranës për ndihmë të mëtejshme mjekësore”, shkruan ambasada e SHBA-së. Për operacionin e kërkim-shpëtimit të policëve ka ndërhyrë në kohë edhe kryepolici Gledis Nano, që kontaktoi me autoritetet në Kosovë për të siguruar mbështetje logjistike të specializuar për zona të rrezikshme dhe të thella. Pas 12 orë përpjekjesh, 54-vjeçari u nxor nga humnera, deri në një pikë ku mund të ulej helikopteri apo të bëhej tërheqja e tij me litarë, teksa zona ishte 6 orë në këmbë. Mësohet se Frroku është në gjendje më të rënduar pasi ka 3 brinjë dhe njërën këmbë të thyer, teksa efektivi tjetër, identiteti i të cilit nuk dihet, ka thyer kaviljen.