Furtunë me breshër dhe shi në gjithë vendin, thyhen pemë dhe shkatërrohen të mbjella në disa qarqe

Moti i keq i befasishëm përfshiu zonën qendrore, veri-perëndimore dhe jug-lindore të vendit, me furtunë, breshër dhe reshje të dendura shiu, ku nuk shpëtoi as kryeqyteti. Për më shumë se një orë, rrugët u përmbytën, teksa ka pasur rrëzim pemësh dhe shkatërrim të mbjellash. Në qytetin e Elbasanit, si pasojë e rrebeshit të shiut është thyer një pemë dhe ajo ka bllokuar rrugën pranë “Urës së Zaranikës”. Ndërkohë, në Maliq është raportuar për breshër, kur ka dëmtuar të mbjellat e fermerëve, kryesisht në fshatrat Pendavinj dhe Tërovë. Kurse në Librazhd, një makinë si pasojë e rrugës së rrëshqitshme, ka humbur kontrollin dhe është përmbysur. Edhe qarku i Lezhës është përfshirë nga stuhi me reshje të dendura shiu, të cilat kanë krijuar probleme në disa zona. Në qytet, uji ka vërshuar nëpër rrugë dhe lagje, madje duke prekur dhe disa biznese. Situata me problematike është krijuar ne bulevardin “Gjergj Fishta”, në rrugën pranë shkollave dhe bllokun e banimit “11 janari”. Niveli i ujit ka arritur në disa cm, duke vështirësuar lëvizjen e qytetarëve dhe automjeteve.

Reshjet e dendura të shiut kanë krijuar probleme dhe në Kurbin, për rrjedhoje vërshimi i ujit ka bllokuar lëvizjen e automjeteve në Fushë-Mamurras. Një pjesë e automjeteve detyrohen të kthehen për të ndjekur rrugë alternative, nga bllokimi i nënkalimit ne aksin e autostradës Milot-Thumanë.

Edhe në aksin nacional Korcë-Pogradec, në afërsi të fshatit Bulgarec, era e fortë ka rrëzuar një pemë duke bllokuar kështu një anë të aksit. Sipas informacioneve, mësohet se dëmet që rreshjet e breshërit i kanë shkaktuar bujqësisë, në zonën e Maliqit, llogaritet 3 dynymë qepë dhe disa parcela gruri.