Zelensky: Shpalleni Rusinë shtet terrorist!
Presidenti ukrainas, Volodymyr Zelensky, i kërkoi botës “të njohë zyrtarisht Rusinë si një shtet terrorist dhe si sponsor të terrorizmit”. Zelensky ka njoftuar se në fjalimin e tij në Këshillin Europian do të flasë për “terrorin” që është bërë në fakt forma e vetme e veprimit të shtetit rus ndaj Europës”. “Kjo pasqyron realitetin e përditshëm që pushtuesit kanë krijuar në Ukrainë dhe mezi presin ta sjellin në Europë. Dhe kjo duhet të vërtetohet ligjërisht. Terror në tokën ukrainase. Terror në tregun e energjisë në Europë, jo vetëm në vendin tonë. Terror në tregun ushqimor, në shkallë globale. Dhe cili do të jetë terrori i radhës?”, pyeti presidenti ukrainas.
Këshilltari i Ministrit të Brendshëm ukrainas, Viktor Andrusiv, gjatë një interviste për “Canale 24”, deklaroi se gjatë luftës në Ukrainë, janë shkatërruar mbi 30% e tankeve të ushtrisë ruse. “Para luftës kundër Ukrainës, Rusia kishte rreth 3 mijë tanke moderne dhe mbi 30% e tyre u shkatërruan nga mbrojtësit tanë në tre muaj. Për gjashtë muaj kjo shifër vetëm do të rritet”, tha Andrusiv duke konfirmuar se Moska u detyrua të rifuste në shërbim tanket e vjetra T-62 të projektuar nga sovjetikët, që datojnë në vitet 1970”, tha Andrusiv.
Presidenti i Turqisë, Recep Tayyip Erdogan, është shprehur se bisedimet e javës së kaluar me delegacionet finlandeze dhe suedeze nuk ishin në “nivelin e pritur” dhe Ankaraja nuk mund të miratojë kërkesat e tyre për t’u bashkuar me aleancën ushtarake të NATO-s. “Për sa kohë që Tajip Erdogan është kreu i Republikës së Turqisë, ne definitivisht nuk mund t’u themi
“po” vendeve që mbështesin hyrjen e terrorizmit në NATO”, tha presidenti. Pa mbështetjen e të gjithë anëtarëve të NATO-s, Suedia dhe Finlanda nuk mund t’i bashkohen aleancës ushtarake.
Të dy vendet nordike mohojnë mbështetjen e militantëve kurdë. Por ata i janë bashkuar vendeve të tjera të BE-së në vendosjen e një embargoje të armëve ndaj Turqisë pas operacioneve të saj kundër grupeve kurde në Siri.
Erdogan nuk ndryshon qëndrim: Nuk e mbështesim anëtarësimin e Suedisë dhe Finlandës në NATO