Thellohet horrori: Foshnja që u gjet në valixhe lindi i gjallë nga 40-vjeçarja
Ndryshon dinamika hetimore për ngjarjen makabre të Korçës. Analizat konfirmojnë se Valmira Hasimllari bëri lindje në kushte shtëpie dhe nën ndikimin e diagnozave të skizofrenisë së saj ndërmori aktin ekstrem të futjes në valixhe dhe më tej në dollap. Rëndohet akuza edhe për vrasje, hetuesit në hall se çfarë të bëjnë me 40-vjeçaren e shtruar në Psikiatri, nënë edhe e një djali po të sëmurë. Analiza edhe për atësinë, nëse është fryt i përdhunimit apo i bashkëshortit, që e mohoi pas zbulimit të ngjarjes
Insituti i Mjekësisë Ligjore zbulon pas më shumë se një muaji, shkakun e vdekjes së foshnjës që u gjet në valixhe në Korçë, i futur nga nëna e sëmurë mendore. Konfirmohet se foshnja i gjetur në valixhe i pajetë, ka lindur i gjallë, por më tej 40-vjeçarja Valmira Hasimllari nën efektin e haluçinacioneve dhe bipolaritetit të theksuar, ia ka marrë jetën, edhe për faktin se dyshohej që nuk e kishte me burrin e saj emigrant në Greqi.
“Ka qenë me shenja jete, kur është futur në valixhe nga nëna 40-vjeçare me sëmundje të theksuara të shëndetit mendor”, thanë burime nga policia vendore. Kjo rëndon akoma më shumë pozitën e të dyshuarës, që ka dhe akuzën e vrasjes me paramendim, por për shkak të kartelës shëndetësore, është rekomanduar që të mbahet e izoluar në Psikiatri dhe paralelisht të hetohet. Mostrat e foshnjës të gjinisë mashkullore u dërguan menjëherë pas zbulimit të ngjarjes drejt Tiranës, ku konfirmohet se foshnja ka lindur i gjallë.
Pritet që akti i ekspertimit të mbërrijë në Prokurorinë e Korçës, për të bërë më pas edhe ndarjen e veprës penale që rëndon mbi Valmira Hasimllarin.
Sipas mjekëve dhe psikologes që ndoqi rastin, prej 1 viti, nëna ishte diagonstikuar me probleme të depersonalizimit dhe foshnja u gjet në valixhe nga bashkëshorti i kthyer prej një muaji nga emigracioni. Era e keqe në shtëpi e vuri në dyshime kryefamiljarin, që kur kontrolloi brenda valixhes në dollap, zbuloi fetusin siç u deklarua paraprakisht. Më parë u raportua që nëna kishte abortuar dhe kishte futur fetusin në valixhe, por ekspertiza tregoi të kundërtën.
Kujtojmë se nëna 40 vjeçare që ndërmorri këtë akt të tmerrshëm vuan nga probleme të theksuara të shëndetit mendor dhe gjatë gjithë kësaj kohë është trajtuar dhe është mbajtur nën vëzhgim nga instancat përkatëse.
Kryefamiljari dëshmoi se fëmija nuk ishte i tiji pasi ndodhej në Greqi prej gjashtë muajsh dhe foshnja ishte fetus, por tashmë dinamika ndryshon, sepse 40-vjeçarja mund të ketë vrarë fëmijën e saj të ngjizur me bashkëshortin. Do të kryhet edhe një analizë për ADN-në atërore, për të konfirmuar apo përjashtuar abuzimin seksual nga ndonjë person tjetër që do konsiderohet përdhunim si vepër penale. E dyshuara është nënë e një fëmije të mitur djal, po me probleme shëndetësore të autizmit.
Krimin makabër e ka denoncuar bashkëshorti i Valmira Hasimllarit, i cili pasi ishte kthyer nga Greqia kishte nuhatur erën e rëndë që vinte nga valixhja ku ishte futur foshnja, e lindur në kushte shtëpie. Pasi nëna u dërgua në spital, mjekja neuropsikiatre tregoi se 40-vjeçarja prej 1 viti ishte diagnostikuar me depersonalizim, por nuk ishte mjekuar. Sipas mjekes, gruaja vuan nga çrregullime serioze psikotike ndaj duhet të qëndronte e shtruar në spital.