KPK e konfirmon në Vetting, prokurori Bonjaku e pret me ‘baticë emocionale’ dhe puth bashkëshorten në sallë
Rikonfirmimi në detyrë nga Komisioni i Pavarur i Kualifikimit ditën e djeshme, është bërë shkak për një ‘baticë emocionale’ që përfshiu prokurorin e Krujës, Florian Bonjaku. Sapo mësoi përgjigjen pozitive për ‘kalimin e klasës’ në Vetting, ai nuk u përmbajt dot duke dalë nga statura e juristit, pavarësisht vendit ku ndodhej dhe shkoi të bashkëshortja, duke e përqafuar dhe puthur atë. Një gjendje humane kjo normale, por që u prit me interes nga të pranishmit dhe media, duke publikuar momentet ‘delikate’ apo shoqëruar me ndonjë buzëqeshje nga të pranishmit. Bonjaku u pa si i aftë për të vijuar detyrën nga një trupë vlerësimi e përberë nga Xhensila Pine, Olsi Komicin dhe Valbona Sanxhktari. Komici tha gjatë relatimit se Bonjakut i ishte kaluar barrë prove për “cënimin e besimit të publikut te drejtësia”, në lidhje me një kontratë shit-blerjeje me vjehrrin dhe vjehrrën, që prokurori pranoi se ishte bërë vetëm formalisht me qëllim marrjen e një kredie. Komici tha se Bonjakut i ishin kërkuar shpjegime në transaksionet e bëra cash për shitjen e një apartamenti 9.6 milionë lekë dhe blerjen e një apartamenti për 8.9 milionë lekë. Bonjakut po ashtu iu kërkuan shpjegime në lidhje me zbutjen e akuzës ndaj një personi të arrestuar për kultivim narkotikësh, por të dërguar në gjykim për “moskallëzim krimi”. Bonjaku këmbënguli se kontrata me familjen e bashkëshortes nuk kishte dëmtuar askënd dhe se kishte qenë e vetmja formë që ai dhe familja të bëheshin me shtëpi. Tre herë gjatë seancës, të pranishmëve, kryesisht familjarë të Bonjakut, iu bënë me dije rregullat, përfshi kërkesën specifike për të mos fotografuar apo filmuar gjatë seancës. Ndërkohë i pranishëm në sallë në pjesën e publikut ishte edhe rektori i Universitetit të Tiranës, Artan Hoxha.