Policit i hedhin shtëpinë ne erë me tritol, shpëton familja. Vuka: S’kam konflikte, dyshoj për detyrën!

Sulmet ndaj oficerëve blu kthehen në ‘trend’ alarmues në qytetin verior, i katërti rast radhazi në disa javë. Besohet se ka lidhje edhe me operacionet antikanabis në Dukagjin. Persona të paidentifikuar i vendosën sasi të madhe eksplozivi shtëpisë dhe makinës së Pëllumb Vukës, dëme të shumta materiale, asnjë i lënduar. Efektivi i Komisariatit dëshmon për kolegët se nuk ka asnjë konflikt jashtë pune. Pista kryesore, për shkak të detyrës.

Fati duket se ka shpëtuar jetët e familjes së një efektivi policie në Shkodër. Persona ende të paidentifikuar hodhën në erë me eksploziv banesën gjatë orëve të para të mëngjesit të djeshëm, ku rreth orës 02:25, shpërthimi tronditi familjen e policit Pëllumb Vuka. Pranë murit të banesës, në fshatin Hot i Ri, shpërtheu tritoli që la gjurmë të dukshme dhe dëme të konsiderueshme. Banesa ishte në pronësi të 49-vjeçarit, oficer policie në Komisariatin e Policisë Shkodër. Për pasojë ka vetëm dëme materiale në banesë, si dhe është dëmtuar edhe mjeti i tij tip “Benz”, i parkuar para banesës. Vuka u shpreh për kolegët se në momentin e shpërthimit ka qenë në shtëpi së bashku me familjen.

Pista kryesore e hetimit të shpërthimit me tritol është për shkak të detyrës, që i qëndron edhe vetë Vuka, pasi mohoi të ketë konflikte të tjera personale apo për pronësi. “Grupi hetimor, nën drejtimin e Prokurorisë së Rrethit Gjyqësor Shkodër, po punon për zbardhjen dhe sqarimin e plotë të kësaj ngjarjeje, identifikimin dhe kapjen e autorit/ ve”, thuhet në njoftimin zyrtar. Efektivi u shpreh se familja është e tronditur nga ngjarja dhe në panik nga shpërthimi që shkatërroi tërësisht dyer, dritare dhe muret ballore ku u vendos eksplozivi. Po për fat të mirë nuk pati të lënduar. Paraprakisht nuk ka të dhëna që efektivi të jetë përfshirë edhe në ndonjë incident, shkelje apo përplasje në veprime arbitrare, teksa skeda në Komisariat është e pastër. Hetuesit përjashtojnë edhe një inskenim, për shkak se sasia e eksplozivit ka qenë e madhe dhe me rrezik jete për të pranishmit. Ky është rasti i katërt brenda pak javësh që oficerët e policisë së Shkodrës bien pre e sulmeve. Më 20 maj, u vendos tritol në lokalin në pronësi të efektivit Ndrek Rasa, 46 vjeç. Më 27 prill u dogj makina e Dritan Turhanit, në lagjen “Perash”, ndërsa më 14 maj makina e Sokol Kroni, në lagjen “Tre Heronjtë”. Të gjitha këto ngjarje janë ende pa autorë. Vetë disa prej efektivëve thanë se sulmet mund të kenë lidhje edhe me pjesëmarrjen e tyre në operacionet e policisë vendore për antikanabisin në Dukagjin. Duket se qëllimi i tyre nuk është të kryejnë vrasje, por t’i paralajmërojnë për ndonjë përplasje që mund të kenë pasur më parë, që shpesh-herë vjen për shkak të detyrës, por edhe aksioneve.