Ekzekutohet për hakmarrje tregtari i peshkut, babai i ish ‘të fortit’ Indrit Bajri
Persona të paidentifikuar qëlluan nga një makinë në lëvizje, teksa Naim Bajri, që punonte në merkatën e prodhimeve të detit në “Rus”, po pinte kafen e mëngjesit në lokalin aty pranë. Plagoset lehtë punëtori i tij, Astrit Zeneli, u zbrazën 10 plumba, atentati dyshohet i paguar te killera profesionistë. Gjendet makina “Benz”, e djegur dhe braktisur në Livadhe. Viktima s’kishte konflikte të tjera, më 2001 i vranë djalin pas një sherri banal, saga e hakmarrjes dyshohet se vijoi më pas. Ja pistat dhe të dyshuarit, zbarkon RENEA në qytet, mblidhen provat e para
Rikthehen atentatet mafioze në Shkodër, në hakmarrje e larje hesapesh mes bandave rivale, të nisura prej më shumë se dy dekadash në qytetin verior. Persona ende të paidentifikuar, por që besohet se i përkasin një grupi killerash profesionistë, lanë të vdekur në një sulm vrastar Naim Bajrin, i njohur si biznesmen i vogël në qytet, teksa ishte duke pirë kafenë e mëngjesit me punëtorin e tij, i cili gjithashtu mbeti i plagosur. Autorët kanë marrë parasysh edhe ‘dëmet anësore’, duke rrezikuar jetët e shumë qytetarëve, pasi Bajri nuk lëvizte kurrë vetëm, teksa ruhej nga ndonjë hakmarrje dhe qëndronte gjithmon në vende publike. Por shënjestra e atentatorëve ishte pothuajse plotësisht e saktë, teksa pas krimit dogjën edhe makinën e përdorur “Benz” në periferi, bashkë me provat fizike dhe biologjike. Bëhet e ditur se viktima Naim Bajri, është tregtar peshku në markatën e lagjes “Rus”. Autorët kanë ndjekur lëvizjet e tij, kurse ekspertët konstatuan se e kanë qëlluar 10 herë me armë nga distanca e afërt dhe disa nga plumbat në trup ishin vdekjeprurës. Ngjarja ka ndodhur pranë markatës në lagjen “Rus”, rreth orës 07:20 të mëngjesit, kur Naim Bajri, i njohur si babai i ish ‘të fortit’ të Shkodrës, Indrit Bajri, i ekzekutuar në luftë bandash në vitin 2001, doli si zakonisht për të pirë kafen në lokalin e zonës.
Policia e Shkodrës ka dhënë edhe detajet e ekzekutimit në lagjen “Partizani”, duke i cilësuar rrethanat si ende të paqarta, kurse për viktimën konfirmuan se ishte Naim Bajri, 68 vjeç, banues në GJYQI fshatin Dobraç. Trupi i Bajrit qëndroi për minuta të tëra në trotuar i pajetë, përmbys dhe i mbuluar me çarçaf. I plagosur lehtë sipas policisë vendore, jashtë rrezikut për jetën, mbeti Astrit Zeneli, 58 vjeç, banues po në fshatin Dobraç, punëtor te viktima. “Gjithashtu në zonën e Livadheve, në lagjen “Guerrile”, është gjetur i djegur një mjet që dyshohet të jetë përdorur nga autorët. Ekspertët bënë këqyrje për provat, u ngritën postblloqe dhe po kryhen kontrolle territori, bashkë me forcat e FNSH Shkodër dhe specialet e RENEA-s”, thuhet në njoftimin zyrtar. Gjithashtu grupi hetimor, nën drejtimin e Prokurorisë, po vijon punën për zbardhjen dhe sqarimin e plotë të rrethanave të ngjarjes. Hakmarrja dyshohet të jetë pista kryesore e hetimeve, kjo për shkak se viktimës i kanë vrarë të birin Indit Bajrin. Vrasësit e Indrit Bajrit kanë qenë Xhabir Shega, Ilmir Hajdari dhe Kujtim Barbullushi. Xhabir Shega është ekzekutuar në vitin 2015, ndaj besohet se kjo sagë e përgjakshme hakmarrjeje, me disa viktima në dy dekada, ka vijuar edhe ditën e djeshme, sepse viktima nuk kishte konflikte të tjera. Oficerët i kanë marrë dëshminë e plotë edhe punonjësit të plagosur, që rrëfeu detajet nga veprimi i atentatorëve, çfarë thanë kur qëlluan, si vepruan dhe nëse vuri re ndonjë shenjë dalluese apo karakteristikë. Gjithashtu janë mbledhur pamjet filmike të kamerave të sigurisë së zonës, për të veçuar ndonjë detaj me rëndësi hetimi. Makina e përdorur në krim besohet se ka qenë e vjedhur dhe me targa false. Naim Bajri ishte tregtar i prodhimeve të detit dhe punonte pranë merkatës se rusit, bashkë me punonjësin e tij Astrit Zeneli, i cili mbeti i plagosur.