Digjet zyra e noterit të arrestuar, gjenden dokumente të ish-prokurorit dhe gruas së ish-kryebashkiakut

Kamerat filmuan një person të maskuar që i vuri zjarrin subjektit në qendër të qytetit bregdetar, në pronësi të Aleko Anagnostit. Vetëm pas ngjarjes, organi i akuzës u kujtua për sekuestron, dëme të shumta materiale. Zbulohen dokumente të noterit Lulaj, ish-prokuror në Tiranë dhe noteres Gjoka, gruaja e ish-bashkiakut të Sarandës. Vijojnë verifikimet e tjera, kontroll të gjitha akteve të shitjes së pronave në bregdet. Anagnosti ndodhet në masë sigurie me 45 ditë nga Gjykata, për skandalin e tjetërsimit të lulishtes në kantier ndërtimi dhe falsifikim shkresash, bashkë me zyrtarë vendorë

Katër ditë pas arrestimit në Sarandë, digjet në rrethana të paqarta dhe misterioze zyra e noterit Aleko Anagnosti. Persona të paidentifikuar, ku sipas filmimeve të kamerave njëri dallohet teksa vendos zjarrin i maskuar orët e para të mëngjesit të djeshëm, sulmuan subjektin juridik në qendër të qytetit bregdetar. Anagnosti prej 1 qershorit ndodhet i arrestuar me urdhër të Prokurorisë së Sarandës, kurse Gjykata e la dy ditë më parë me masën 45 ditë paraburgim, duke lënë kohë për gjetjen e provave shtesë nga organi i akuzës, për veprën penale të tjetërsimit të lulishtes në kantier ndërtimi për bizneset dhe falsifikimin e dokumenteve. Dëmet materiale nga zjarri konsiderohen të mëdha, por Policia arriti që pas sekuestrimit të gjente dosje me rëndësi dhe emra me peshë të sigluar në materialet e Anagnostit. Zyra për procedurë duhet të ishte ‘dyllosur’ më parë nga organet ligjzbatuese, por u desh zjarri i djeshëm që hetuesit të kujtoheshin se si person nën akuzë të rëndë duhej sekuestruar apo kontrolluar subjekti e banesa.

Në zyrën e Aleko Anagnostit, janë gjetur dokumente të noterëve të tjerë. Përveç dokumenteve të tij ndodhej edhe gjithë dokumentacioni i ish-noterit Artan Lulaj, i cili ka ushtruar edhe detyrën e Prokurorit në Tiranë. Po ashtu një pjesë e dokumentacionit është e ish-noteres Ermioni Gjoka, bashkëshortja e ish-kryetarit të Bashkisë Sarandë, Edmond Gjoka, në vitet 2003-2011. Ermioni Gjoka më parë ka qenë notere shteti, e më pas ka punuar në privat. Anagnosti ka arkivën e pjesës së noteres së shtetit. Policia po vazhdon këqyrjen e vendit të ngjarjes, për të përcaktuar dëmet e shkaktuara ndërkohë që njëkohësisht po kryhet dhe sekuestrimi i zyrës me urdhër të prokurorit. Për shkak e noteri ndodhet në paraburgimin e Sarandës, në vendngjarje është paraqitur nëna e tij e moshuar.

Anagnosti është në mesin e zyrtarëve të arrestuar më 1 qershor. Në pranga ranë Drejtori i Urbanistikës Pandi Zhonga në Bashki, që u lirua nga gjykata ën fundjavë, Rovena Alikaj, juriste në agjencinë shtetërore të kadastrës, 3 ndërtues përfitues të truallit, teksa në kërkim është ish-drejtori i Kadastrës në qytet dhe 2 vëllezër biznesmenë që pasi e tjetërsuan truallin 10 mijë metra katrorë, e shitën tek ndërtues të tjerë.

Ata dyshohet se kanë shpërdoruar detyrën, duke abuzuar me lejet e ndërtimit, teksa noteri ishte implikuar në përgatitjen e akteve të pronësisë. Arrestimet e tyre janë bërë urdhër të Prokurorisë së Sarandës, e cila pas hetimeve zbuloi se këta persona kanë tjetërsuar 10 mijë metër katror tokë shtetërorë që ishte lulishte në Sarandë, me 10 persona të implikuar. Pas tre orë e gjysmë seance, gjyqtari vendosi ndryshimin “arrest në shtëpi” për Pandi Zhongen, drejtor i Urbanistikës në bashki, Rovena Alikajn, juriste në ASHK, Arhondia Caraj, përfituese trualli dhe Valter Llomi, përfitues trualli.

Në zonë ka një numër të madh kamerash sigurie, të cilat kanë fiksuar autorin e maskuar.

Policia ka sekuestruar pamjet e kamerave edhe të shumë bizneseve dhe kamerat e qytetit dhe vijon duke kqyrur pamjet për të arritur në identifikimin e autorit.