Habit ekonomia shqiptare, konsumatori dhe bizneset, më optimistë gjatë majit
Ekonomia shqiptare duket se ka surprizuar gjatë majit. Në vrojtimin më të fundit të biznesit dhe atë konsumator (VBBK), Banka e Shqipërisë flet për një kthesë, pasi Treguesi i Ndjesisë Ekonomike (TNE) është rritur gjatë majit për të parën herë këtë vit. Rritja fikoshet në 4.6 pikë përqindje, dhe është nxitur nga përmirësimi i besimit në thuajse të gjithë sektorët e ekonomisë, por veçanërisht nga sektori i shërbimeve dhe ai i tregtisë. Të gjithë treguesit janë regjistruar me rritje gjatë muajit maj, përveç atij që mat besimin në sektorin e ndërtimit. Por, surpriza më e madhe duket se vjen nga Treguesi i Besimit Konsumator. Sipas vrojtimit më të fundit të Bankës së Shqipërisë, besimi konsumator gjatë muajit të kaluar është rritur me 2 pikë përqindje. “Kjo rritje reflektoi përmirësimin e të gjithë komponentëve përbërës të TBKsë: vlerësimin lidhur me blerjet në shuma të mëdha, pritjet për situatën e tyre financiare dhe për situatën e përgjithshme ekonomike në vend”-thekson mes reshtave institucioni në këtë vrojtim. Ky përmirësim i perceptimit të përgjithshëm të konsumatorit mbi situatën e tyre dhe situatën e pëgjithshme të vendit vjen pavarësisht faktit se, gjatë muajve të fundit vendi është përfshirë në një krizë çmimesh, kryesisht rrjedhojë e rritjes së ndjeshme të çmimeve të hidrokarbureve, dhe rrjedhimisht në një krizë konsumi. Madje, norma e inflacionit ka prekur një rekord prej më shumë se dy dekadash, duke u ngjitur në 6.2%.
Ndër treguesit e tjerë ndërkohë, rritjen më të madhe e regjistron Treguesi i Besimit në Shërbime, në rritje me 7.2 pikë përqindje në muajin maj, krahasuar me muajin e kaluar. “Rritja e tij u përcaktua nga vlerësimet më optimiste të bizneseve, si për ecurinë e aktivitetit të tyre, ashtu edhe për kërkesën. Pritjet e bizneseve të shërbimeve për nivelin e punësimit dhe të çmimeve të tyre në të ardhmen janë në rritje këtë muaj”-nënvizon Banka e Shqipërisë.
Rritje të ndjeshme, me 6.8 pikë përqindje regjistron edhe Treguesi i Besimit në Tregti, i ndikuar nga vlerësimet optimiste të bizneseve të sektorit për ecurinë aktuale të biznesit të tyre, si dhe pritjet optimiste për punësimin në muajt e ardhshëm.