Avioni grek shuan zjarrin e Sazanit. Ministria: Parashikohet verë e nxehtë, rreziku i lartë!
Pas katër ditësh në tym dhe flakë, teksa politika u përfshi në ‘sherr’ me akuza pasi nuk po aktivizoheshin helikopterët “Cougar”, vendi fqinj dërgoi një “Canadair CL 415”, që shoi vatrat brenda disa orësh. 122 trupa në terren, shuhen edhe vatrat në Orosh të Mirditës. Ministria e Mbrojtjes thotë se tashmë vatrat janë neutralizuar, por rreziku për zjarre të tjera mbetet i lartë, për shkak edhe të parashikimeve për një verë të nxehtë dhe piromanëve të papërgjegjshëm
Avioni grek shuan zjarrin e ishullit të Sazanit në pak orë operacion, duke bërë atë që prej katër ditësh s’po e arrinin dot autoritetet shqiptare, duke përfshirë edhe politikën në debate e akuza të forta, për shkak të helikopterëve “Cougar” që nuk u vune në funksionim. Ndërhyrja nga ajri erdhi dje, teksa mjeti fluturues nga vendi fqinj, i specializuar për këto lloj operacionesh në katastrofa natyrore, eleminoi të gjitha vatrat aktive, që shkrumbuan prej ditësh dhjetëra hekatrë me pisha e bimësi. Qeveria konfirmoi dje se Greqia iu përgjigj kërkesës së tyre për një mjet tip “Canadair CL 415”, i njohur ndryshe si bombarduesi i ujit, për shuarjen e zjarrit në Sazan.
Sipas njoftimit nga Ministria e Mbrojtjes, u angazhuan 122 efektivë të Forcave të Armatosura, 9 mjete, 2 anije të cilat arrritën të neutralizonin vatrat e zjarrit në ishillin e Sazanit, por edhe në Orosh të Mirditës, ku gjithashtu pati ditën e djeshme disa vatra zjarri. Menjëherë sapo mbërriti në Shqipëri, avioni Canadair u vu në lëvizje. “Avioni Canadair CL 415 hyri në operacion për shuarjen e zjarrit nga ajri si mbështetje e Mekanizmit të Mbrojtjes Civile të Bashkimit Europian, Emergency Response Coordination Centre (ERCC), pas kërkesës së bërë nga Agjencia Kombëtare e Mbrojtjes Civile. Greqia iu përgjigj menjëherë pozitivisht kërkesës së Shqipërisë”, thuhet në njoftimin e Ministrisë së Mbrojtjes.
Pavarësisht ndërhyrjes nga ajri, puna në terren, Ministria e Mbrojtjes tha se krijimi i brezit të shpyllëzimit mbeten thelbësore për izolimin total të zjarrit në një zonë të ish-repartit ushtarak. Avioni “Canadair CL415” është projektuar posaçërisht për shuarjen e zjarrit nga ajri, por mund të kryejë edhe role të tjera të ndryshme, të tilla si kërkim-shpëtimi dhe transporti. Ministri i Mbrojtjes Niko Peleshi, i cili ndodhet për një vizitë zyrtare në Greqi, pas një sërë kontaktesh falenderoi autoritetet atje për përgjigjen në kohë ndaj Shqipërisë. Shqipëria kërkoi ndihmë nga Greqia në pamundësi të helikopterëve shqiptarë për të shuar zjarrin në ishullin e Sazanit. Megjithëse ka tre helikopterë Cougar që kanë kova për të shuar flakët në situata emergjence me zjarret, 2 janë për mirëmbajtje jashtë vendit, që kërkon kohë pasi është një procedurë e gjatë tenderimi, me përfshirje të NATO. Po ashtu MM bën të ditur se janë shuar të gjitha vatrat e zjarrit në Orosh të Mirditës. “Situata në ishullin e Sazanit është nën kontroll, ndërsa puna vijon për të shmangur totalisht mundësinë e rindezjes së flakëve për shkak edhe të bimësisë. Ndërkaq 54 efektivë të FA iu bashkuan forcave zjarrfikëse në aksionin për shuarjen e vatrës së zjarrit në njësinë
administrative Orosh të Mirditës. Në operacionin që u finalizua në një kohë të shpejtë u bë e mundur shmangia e përhapjes së flakëve pranë banesave. Ministria e Mbrojtjes shpreh mirënjohjen për punën e të gjithë ekipeve të angazhuara dhe u bën thirrje qytetarëve, turistëve që këtë sezon pritet të jenë të shumtë të
bëjnë kujdes, pasi kjo verë parashikohet të jetë e nxehtë dhe rreziku nga zjarret mbetet evident. Falenderime të përzemërta Mekanizmit të Mbrojtjes Civile të Bashkimit Evropian për mbështetjen, shtetit fqinj Greqisë për përgjigjen në kohë rekord me avionin Canadair”, thuhet në njoftimin e Ministrisë së Mbrojtjes.