Vrasja për gërvishtjen e makinës dhe për rrahjen, çohet në gjyq dosja. Leonard Bashaliu ekzekutoi fqinjin me armë pas përleshjes
Prokuroria pranë Gjykatës së Shkallës së Parë Elbasan njoftoi dje se ka mbyllur hetimet për Leonard Bashaliun, i cili akuzohet për vrasjen e Ylber Xhahysës, pas një konflikti për parkimin dhe gërvishtjen e makinës në Peqin. Bashaliu akuzohet për veprat penale të “vrasjes me paramendim”, “prishje e qetësisë publike” dhe “mbajtja pa leje dhe prodhimi i armëve, armëve shpërthyese dhe municionit”. Në përfundim të hetimeve, çështja është çuar në Gjykatën e Elbasanit, që nëse do e shpallë fajtor gjatë procesit, do të japë dhe dënimin për të pandehurin. Leonard Bashaliu është arrestuar nga policia menjëherë pas ngjarjes dhe është hetuar me masën e sigurimit “arrest në burg”. Hetimet për këtë procedim penal u kryen në bashkëpunim me Policinë Elbasan dhe prokurori i çështjes është Petref Asllani. Sipas dosjes hetimore, ngjarja ndodhi më 8 qershor 2021, në fshatin Gjoçaj të Peqinit, ku është vrarë Ylber Xhahysa. Autori dhe viktima kanë qenë të përfshirë në një konflikt 5 vite më parë, pasi Xhahysa i ka gërvishtur makinën Bashaliut. Viktima dhe autori u konfliktuan fillimisht verbalisht, por që më pas degradoi edhe në përdorimin e dhunës, ku ata e goditën njëri-tjetrin me karrige e gota. Më pas Leonard Bashaliu ka nxjerrë armën duke qëlluar mbi Ylber Xhahysën dhe duke e lënë atë të vdekur. Në dëshminë e tij i akuzuari ka deklaruar në gjendje të rënduar psikologjike se konflikti me Xhahysën nisi pasi e kishte qëlluar me grushte 5 vite më parë. Ky konflikt i vjetër mes bashkëfshatarëve dyshohet se ka çuar në hasmëri mes familjeve, ku tashmë shënohen dhe 3 viktima.